اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي للعين الضعيفة 11



    
 

حالة هذا الاسبوع ( 100 ) اسماء 27 سنة .. من المنيا

" الحول الوحشي للعين الضعيفة "

فتحت رسايل صفحتي من شهر كده لقيت صورة بنت منقبة عندها حول وحشي كبير أوي في عينها اليمين ..  دار بينا الحوار ده :

·       ازي حضرتك يا دكتور جمال .. انا اسماء من المنيا .. عايزة اسألك على حالتي

·       تحت امرك يا اسماء

·       انا عندي 27 سنة .. اتخرجت من 4 سنين .. متجوزة وعندي بنوتة .. أنا عندي حول وحشي جامد أوي في عيني اليمين زي ما حضرتك شايف في الصورة .. الحول مخلي شكلي وحش قوي ..انا مش بأقدر أبص في وش حد وهو بيكلمني

·       من إمتى عندك الحول ده يا اسماء ؟

·        الحول ظهر عندي وانا في ابتدائي .. الحول مأثر على نفسيتي جداً .. هو ممكن الحول بتاعي يتعدل فعلاً بعملية ؟

·       طبعاً يا بنتي أي حول ممكن يتعدل بعملية فعلاً

·       طيب انا كشفت عندنا والدكاتره قالوا لي ان عيني الحوله نظرها ضعيف جداً.. هي نظرها هيتحسن بعد العملية ؟

·       بصي يا اسماء .. عمليات الحول مش بتحسن النظر .. العين هتتعدل بالعملية .. لكن النظر مش هيتحسن

·       طيب يا دكتور جمال الكاتره قالوا لي برضه ان مادام العين ضعيفة .. فحتى لو عملتي العملية فالحول لازم هيرجع تاني

·       لأ طبعاً .. الكلام ده مش صح .. فيه فعلاً حوالي 10% بس من الحالات بعد ما بنعدل الحول بيرجع تاني بعد خمس ست سنين كده .. لكن مش كل الناس كده .. الغالبية العظمى من الحالات مش بيرجع لهم الحول ويعيشوا طول عمرهم عينيهم معدوله

·       طيب انت رأيك ايه يا دكتور ؟

·       بصي يا اسماء .. انا متعاطف جداً مع البنات اللي في سنك .. ودايماً اشجعهم يعملوا العملية .. مفيش حل تاني .. يعني ايه خايفه الحول يرجع تاني .. توكلي على الله يا بنتي .. يعني انتي عايزه تعيشي طول عمرك بالحول ده ؟

المهم .. اسماء جت لي بعد يومين العيادة

·       درجة الحول عندك كبيرة قوي يا اسماء .. لازم العملية تتعمل في عينيكي الاتنين .. مش هأعرف أعدلها من الناحية اليمين بس .. لازم اعمل كمان عضلة في العين الشمال السليمة عشان الحول يتعدل بنسبة 100 %

·       بس عيني الشمال دي العين اللي باشوف بيها .. انا خايفة يحصل لها حاجة من العملية

·       بصي يا اسماء .. عمليات الحول مش بتتعمل في العين .. بتتعمل في العضلات اللي بتحرك العين .. يعني لايمكن يحصل حاجة في عينك .. انا أصلاً مش هألمس عينك .. العين نظرها هيفضل زي ماهو .. مش ممكن يتأثر بالعملية

 اسماء من الصعيد .. طلبت مني اعمل لها العملية تاني يوم .. عشان هتبات عند عمها هنا في مصر وعملت لها العملية تاني يوم الصبح  .. العملية كانت في عينيها الاتنين زي ماتفقنا

الكلام ده من شهر كده .. اسماء جت لي تاني النهارده العيادة .. والله ماعرفتها .. مش عشان النقاب .. عشان شكلها بقى حاجة تانية خالص .. الحمد لله رب العالمين .. نتيجة العملية حلوة أوي .. أوي

حمد الله على سلامتك يا بنتي .. يستاهل الحمد والله

د. جمــال صبـــحي     

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders