اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي للعين الضعيفة 18



    
 

حالة هذا الأسبوع ( 174 ) أبو خليل .. 30 سنه من الاسكندرية  

" الحول الوحشي للعين الضعيفة "

إبراهيم مثال واضح لإهمال علاج الحول من الصغر .. زي ما حكى لي الحول ده ظهر عنده وهو في ابتدائي .. الدكاترة قالوا لباباه ومامته لازم يعمل عملية بس هما رفضوا .. زي ماحنا عارفين العين الحولة عند الأطفال لازم تتعدل يا جماعة .... لازم .. مينفعش الكلام اللي بنسمعه كل يوم من الأمهات .. ابني لسه صغير هاستنى شوية لما يكبر وبعدين نعمل العملية .. احنا بنهتم جداً ان الطفل الأحول نعدل عينيه .. مش عشان الطفل مش أمور وكده .. الموضوع مش كده خالص .. احنا بنعدل الحول عشان نحافظ على العين ووظيفتها ويفضل نظرها كويس ..  العين الحولة هتضعف ويحصل فيها كسل وظيفي ونظرها هيقل جداً ... إبراهيم دلوقتي عنده 30 سنة .. طبعاً عشان الحول من فترة طويله عينه اليمين نظرها ضعف أوي .. هو دلوقتي تقريباً بيشوف بالعين الشمال بس .. صحيح الدكاتره أجمعوا ان مستحيل العين دي نظرها يتحسن بعد الكسل الشديد لفترة طويلة ... لكن ليه نسيب إبراهيم عايش بالشكل ده .. لما إبراهيم جه لي العياده  قلت له طبعاً عملية الحول هتغير شكلك خالص .. لكن النظر مش هيتحسن .. عملية حول للتجميل بس مش لتحسين النظر .. تمارين تحسين النظر بتجيب نتيجة عند الأطفال بس يا ايراهيم .. انت دلوقتي 30 سنة .. صعب جداً فعلاً ان النظر في العين دي يتحسن ..   

طبعاً سألني السؤال الشهير .. فيه احتمال ان الحول يرجع عشان العين ضعيفة ؟

واجابتي اللي كلكم حفظتوها .. اياك تصدق ان العملية مش هتنجح عشان العين نظرها ضعيف .. او ان الحول لازم هيرجع تاني .. ده اعتقاد خاطئ عند كتير من المرضى

صحيح فيه احتمال ان الحول يرجع .. لكن نسبة رجوعه قليله متزيدش عن 10% من المرضى .. مش معقول نسيب 100 واحد عايشين بالحول ده عشان خايفين ان 10 منهم بس ممكن يرجع لهم الحول ... ايه المنطق الغريب ده .. طيب وايه يعني .. مايرجع .. ماهو لما يرجع هنعمل عمليه تاني والعين هتتعدل برضه ... مش أحسن ما نعيش بالمنظر ده

إبراهيم كان شجاع ووافق يعمل العمليه .. الحمد لله عمليته هايله .. دي صورته بعد العمليه بشهرين .. شكله بقى غير .. حاجه تانيه خالص .. مش قادر اوصف لكم  أد ايه هو فرحان بشكله الجديد الجميل ...

بذمتكم أيهما أفضل .. أعيش طول عمري عايش بالحول ده أحسن خايف ان الحول ممكن بعد كام سنه يرجع لي تاني .. أروح الجامعه بالمنظر ده وأشتغل بالمنظر ده وأتجوز بالمنظر ده وولادي يشوفوني بالمنظر ده .. ولا أتوكل على الله وأعمل العمليه وأغير شكلي واستعيد ثقتي بنفسي وأعيش بشكل طبيعي زي كل الناس .. 

حمد الله على سلامتك يا أبو خليل .. والف مبروك

  د. جمــال صبـــحي     

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders