اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي للعين الضعيفة 19

حالة هذا الأسبوع (177) دعاء احمد عباس .. 8 سنين .. من قنا

الحول ده نادرعند الأطفال .. وكتيرلما بنفحص الاطفال دول بنلاقي عندهم مشكلة تانية في العين خلت النظر ضعيف وعشان كده العين حولت لبره .. يعني حول وحشي

وعشان كده دايماً بأقول للأمهات .. يا جماعة أي طفل عنده حول وحشي لازم يتفحص فوراً أحسن يكون عنده حاجة في عينه أهم من الحول ولازم تتعالج بسرعة .. زي مشاكل الشبكية اللي بتيجي من الحضانات .. وزي الميه البيضا عند الاطفال .. وزي الأمراض الخلقية للعصب البصري .. أو أمراض تانية بتيجي للأطفال في سن صغيرة وتضعف عين من عينيهم فيحصل لها حول وحشي

تصدقوا يا جماعة ان الاطفال الصغيرين اللي عندهم ميه بيضا دايماً بنكتشفهم في عيادة الحول .. تصدقوا ان لما طفل يكون عين من عينيه ضعيفة بنكتشفها لما نلاقي العين بتحدف لبره - يعني حول وحشي

المهم .. من حوالي شهر كده .. مامة دعاء جت لي من قنا معاها بنتها القمر دي .. قالت لي ان الحول ده ظهر لدعاء وهي عندها 3 سنين .. طبعا لأن المعلومات اللي قلتها عن الحول الوحشي عند الأطفال كل زمايلي الدكاترة عارفينها .. الدكاترة في قنا طلبوا ان دعاء تعمل فحوصات كتير على العين دي عشان يكتشفوا سبب ان العين حولت كده .. مامة دعاء كان معاها ظرف كبير فيه كل الأشعات والفحوصات اللي دعاء عملتها .. لقيت فعلاً الأشعات والفحوصات بتبين ان العين الشمال فيها ضمور جزئي في العصب البصري .. يعني العين دي نظرها ضعيف وده اللي خلاها تحول كده

مامة دعاء قالت لي انا عارفة ان عملية الحول هتعدل الحول بس .. لكن النظر هيفضل زي ما هو لأن العصب البصري ضعيف من زمان .. أنا موافقة طبعاً أعمل عملية الحول لبنتي حتى لو العين نظرها هيفضل زي ما هو .. على الأقل بنتي هيبقى شكلها طبيعي زي اصحابها ومش هتبقى محرجة ومكسوفة من الحول اللي عندها

عملت لدعاء العملية وسافروا قنا بعد العملية على طول .. من كام يوم كدا الصبح بدري .. بافتح رسايل الفيس عندي لقيت مفاجأة جميلة جداً .. لقيت صورة القمر ده ومعاها الكلمات الرقيقة الجميلة دي اللي خلت يومي كله جميل زيها   

الف حمد الله على سلامة دعاء يافندم .. والف شكر لحضرتك

د. جمــال صبـــحي     

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders