اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي للعين الضعيفة 22


 

حالة هذا الأسبوع ( 199 )  سهيلة خالد .. 6 سنين  .. من شبين القناطر

" عينيها اتعدلت من غير عملية "

  في الحقيقة انواع الحول كتير جدا وفيه طرق كتيره جدا لعلاج الحول .. فكل نوع من انواع الحول ليه طريقة علاج النوع ده ولاتصلح هذه الطريقه لعلاج الأنواع الاخرى ..

·     فيه حول بيتعالج بلبس النضارة زي حول طول النظر

·     وفيه حول بيتعالج بتمارين لعضلات العين

·     وفيه حول بيتعالج بلبس انواع معينة من العدسات

·     وفيه حول بيتعالج بحقن عضلات العين

·     وفيه حول بيتعالج بالنضارات المنشورية

·     وفيه حول بيتعالج بأدوية بس زي حول وهن العضلات

·     وفيه حول ملهوش أي علاج غير العملية

وعشان كده لازم نشوف المريض ونحدد نوع الحول اللي عنده عشان نعرف هو علاجه عملية ولا فيه علاج تاني غير العملية

وعشان كده برضه ياجماعه - متزعلوش مني - قبل ما اشوف المريض وأفحصه وأعرف نوع الحول اللي عنده مش باعرف أجاوبكم على الاسئلة دي :

·     انا عندي حول .. علاجه ازاي ؟

·     انا ابني عنده حول رحت لدكتور قال علاجه نضارة .. صح كده ولا غلط ؟

·     انا عملت عملية قبل كده والحول رجع تاني .. فيه علاج تاني غير العملية ؟

·     انا بنتي سنتين وعندها حول .. الدكتور قال مينفعش عملية دلوقتي استني لما تكبر .. صح كده ولا مش صح ؟

·     أنا كشفت لإبني قالوا لي لازم عملية .. صح ولا غلط ؟

·     أنا نظري ضعيف وعندي حول .. اعمل ايه ؟

 

من كام شهر والد سهيلة بعت لي الرسالة دي :

- ( بنتي ابتدا يظهر عندها حول في عينها الشمال .. يظهر ثواني وبعدين يختفي .. ايه ده يا دكتور جمال وعلاجه ايه ؟ )

- ( ألف سلامة عليها يافندم .. لازم تكشف عليها .. مش هأعرف أجاوبك والله .. طيب اكشف عليها وبلغني بنتيجة الكشف )

بعد اسبوع سهيلة جت لي العيادة مع باباها ومامتها .. لقيت عينها الشمال فعلاً بتحول لبره وبعدين تتعدل تاني .. ولقيت سبب كده ان عينها الشمال ضعيفة .. فيها قصر نظر .. والعين اليمين نظرها ممتاز .. وفي الحالات دي اللي فيها الطفل يكون عنده عين قوية وعين ضعيفة ساعات يحصل حول في العين الضعيفة .. زي سهيلة كده
كتير من الولاد دول لو قدرنا نحسن النظر في العين الضعيفة عن طريق لبس نضارة وتمارين التغطية .. كتير منهم نلاقي الحول اتعدل لوحده من غير عمليات ولا حاجة .. زي سهيلة كده .. بعد 6 شهور من إلتزام مامتها الشاطرة بالنضارة والتمارين عينها اتعدلت تماماً والحول مابقاش يظهر أبداً .. ومن غير عمليات

ألف حمد االله على سلامتك يا بنتي

د. جمــال صبحــي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders