اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي للعين الضعيفة 3


    
 

 

حالة هذا الاسبوع : إنجي المختار 22 سنة من القاهرة

الحول الوحشي الدائم

 إنجي دي ياجماعة من أحلى العمليات اللي عملتها في حياتي .. انا طبعا مقصدش العملية الجراحية .. انا قصدي إنجي هي أشجع وأرق بنوتة عملتلها عملية .. طيب نخش في الموضوع :

                             من كام يوم كدة جالي تليفون :

     - حضرتك دكتور جمال صبحي

-         ايوة انا يابنتي

- انا إنجي يا دكتور جمال .. إنجي المختار .. مش فاكرني ازاي .. حضرتك عملتلي عملية سنة  2007

- اهلا وسهلا يا إنجي .. خير يا بنتي ؟

- عايزة اجيبلك واحدة صاحبتي عندها نفس مشكلتي .. بكرة .. اوكي شكراً يا دكتور جمال

فوراً فتحت اللاب .. ملف عمليات .. ملف 2007 .. حرف الألف .. إنجي .. إنجي .. إنجي المختار .. اهي .. صورة إنجي قبل العملية .. نوع الحول ( بالانجليزي طبعاً ) الحول الوحشي الدائم.. إنجي صورتها  بنت عادية خالص بحجاب رمادي شكلها مخنوق حبتين .. انا قلت افتكر صورتها عشان لما تيجيلي بكرة اعمل نفسي فاكرها .. عشان ماتزعلشي .. وعشان ابين ان الزهايمر بعد الشر لسه ماصابنيش

اليوم التالي : انا قاعد في العيادة الساعة 9 فوجئت بالقمر ده داخل عليا .. بنت رقيقة جداً .. بابتسامة رائعة .. وسلام ودود ..

-ازيك يا دكتور جمال " انا إنجي " ..

- مش ممكن " انتي إنجي المختار "

طبعاً انا لما بشوف حالة زي إنجي كدة بابقى طاير من الفرحة .. ايه اللي انا عملته ده .. انا باحس اني باعمل عمل رائع .. ازاي مصير انسان ومستقبله كله بيتغير بعد عملية الحول ..

انا باتخيل إنجي ماقابلتنيش .. وفضلت عايشة كدة راضية بحالها .. وكبرت وهي شابة وعايشة مخنوقة مكسوفة وسط البنات .. ولا كانت راحت لدكتور قال لها " اوعي تعملي العملية احسن الحول حيرجع تاني"  .. " اوعي تخلي حد يلعب في عينيكي " .. ولا كانت صدقت الكلام الاهبل ده اللي ساعات بيتقال لمرضى الحول .. إنجي بنت جدعة .. عملتلها العملية .. دي صورتها دلوقتي بعد العملية ..

طبعاً ياجماعة انا منتظر كومنتات مش مصدقة الصور دي ومنتظر تكتبولي : " دي مش دي " .. طيب والله العظيم هي هي .. وعلى فكرة انا مش بازعل من كومنت " دي مش دي " .. انا باحس اني عملت لانسان نقلة كبيرة في حياته غيره كتير بيتمناها ..

بجد شكراً انك وافقتي انزل صورتك على صفحتي وسعيد بشجاعتك وانتي بتقوليلي:  " نفسي كل بنت عندها حول تشوف صورتي قبل وبعد العملية " .. الحمد لله ان ربنا وفقني في عمليتك يا إنجي وياريتني اكون على طول السبب في فرحة وسعادة كل المخنوقين من المرض البايخ ده

شكراً كمان مرة .. وربنا يوفقك يا بنتي ..

د جمـــال صبحــي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders