اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي للعين الضعيفة 4


    
 

 

حالة هذا الأسبوع ( 26 ) : مصطفى جمال الشريف 23 سنة .. من دمنهور

الحول الوحشي عند الكبار

أولاً الف شكر ليك يادرش انك وافقت اني انزل صورك على صفحتي 

 نتايج عمليات الحول الوحشي عند الولاد الكبار اللي زي مصطفى يا جماعة لازم الناس تشوفها ..  انا نفسي كل شاب وشابة في عمر مصطفى عندهم نفس الحول ده يراجعوا نفسهم تاني .. ليه راضين بالوضع ده ؟ .. انا ياجماعة باستغرب جداً لما يخش عيادتي شاب أو شابة في عمر مصطفى كده وعنده حول زي ده ويدور بينا الحوار التالي :

- " من امتى يا درش وانت كده ؟ "

- " انا مولود كده يا دكتور جمال  "

- " يعني ايه مولود كده ؟ .. ( طبعاً باقولها وانا متغاظ عالآخر )..عشت احلى سنين عمرك كده  ؟  .. خلصت دراستك وانت كده ؟ .. كنت بتقابل زمايلك واصحابك كده ؟ .. ليه يابني ؟ .. فين والدك .. فين والدتك .. سايبينك ازاي كده ؟ "

وهنا يتدخل الاب الجالس في آخر حجرة الكشف قائلاً بمنتهى الحكمة :

- " والله يا دكتور الناس كلها خوفوني وقالولي إوعي تسيب حد يلعب في عينين ابنك .. وانت عارف طبعاً يا دكتور ان اللعب في العينين غلط .. كذا واحد عمل عملية في بلدنا وعينيهم باظت وحضرتك سيد العارفين "

- " لا والله انا مش عارف يا حاج .. احنا يا فندم مش بنلعب في عينين حد .. احنا اساساً مش بنلعب .. كما ان عمليات الحول مبتبقاش في العين اصلاً .. بتبقى في العضلات اللي بتحرك العين .. والعضلات دي برة العين .. بعيد عنها يعني .. يعني مش ممكن حد عينه تبوظ لو عمل عملية حول .. حتى لو العملية معدلتش عينه برضه عينه مش هتبوظ .. انا بقالي يا حاج اكتر من 30 سنة باعمل عمليات حول ماشفتش حد عينه باظت ولا حاجة ..المهم يافندم .. ياترى ليه حضرتك غيرت رأيك دلوقتي ؟!!! "

- " مصطفى يا دكتور جايله عقد عمل في الامارات .. وعنده كشف طبي عشان السفر .. وقالوا له لازم تشوف حل في موضوع الحول ده "

- " ياسلام !! عقد عمل في الامارات !! .. يعني لو مصطفى ما جالوش عقد عمل في الامارات كنت هتسيبه يكمل حياته في مصر بالشكل ده يا حاج ؟! ..

تاني يوم عملت العملية لمصطفى .. سافر دمنهور بعد العملية بساعتين ..  وفضل معايا بالتليفون يوم بيوم .. عيني حمرا .. بتدمع .. وارمة شوية .. والتليفونات العادية دي اللي انا متعود عليها يوم العملية ..

مصطفى جاني النهاردة .. فات على عمليته اسبوعين تقريباً .. الولد يا جماعة طلع كيوت قوي .. شكله بعد العملية .. حاجة غير .. هو نفسه بيقولي " انا مش مصدق شكلي .. 23 سنة متعود على شكلي كده .. ربنا يخليك يا دكتور جمال .. اخيراً بقى عندي الجرأة اني ابص في عينين اللي بيكلمني من غير كسوف .. انا حاسس يا دكتور ان انا بقيت انسان تاني "

حمد الله على سلامتك يا درش ... عمليتك حلوة فعلاً .. وشكراً كمان مرة انك وافقت انزل صورك على صفحتي

د. ��مــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders