اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي للعين الضعيفة 5


    
 

 

حالة هذا الأسبوع ( 28 ) : جدة الطفلة "جنى محسن" .. 55 سنة

" ممكن نعمل عملية لتيته ؟ "

النهاردة ميعاد استشارة الطفلة "جنى محسن" اللي عملت لها العملية الاسبوع اللي فات .. دور "جنى" جه  ودخلت عندي .. بسم الله ما شاء الله .. العملية هايلة الحمد لله .. البنت بقت زي القمر .. الطفلة " جنى محسن "  5 سنوات  كان عندها حول انسي خلقي زي بنات كتير عرضت صورهم في الصفحة هنا .. المهم مش هو ده الموضوع ..

كان جاي مع "جنى" مامتها وست تانية شكلها جدتها .. كشفت على جنى وبصيت لمامتها

- الحمد لله يا مدام .. البنت زي الفل .. العملية ممتازة يافندم

- تسلم ايديك يا دكتور جمال .. احنا عايزين نسألك على حاجة بخصوص جدتها

- خير يافندم

- جدة "جنى" .. مامتي يعني .. عندها هي كمان حول .. ماما عندها دلوقتي 55 سنة .. ينفع تعمل عملية في السن ده ؟

بصيت لجدة جنى .. ست زي السكر .. على وشها طيبة المصريين المعروفة .. عندها حول وحشي في عينها اليمين .. حول وحشي درجته كبيرة شوية ..

- من امتى يا حاجة الحول ده عند حضرتك ؟ 

- ردت مامة "جنى" .. مش هتصدق يا د.جمال ...ماما قالت لنا  ان الحول ده عندها من صغرها ... احنا وعينا على الدنيا لقينا ماما كده ... انا واخواتي عمرنا ما كلمناها في الموضوع ده عشان هي بتتضايق منه  .. هي نفسها عمرها ما اتكلمت معانا عن موضوع الحول ...عمرها ما فكرت تعمل عملية عشان تعدل الحول ده  او حتى تروح لدكتور تسأله ... من اسبوع بس يا دكتور جمال حصلت مفاجأة من العيار الثقيل :

 كنا راجعين من المستشفى يوم عملية جنى وماما طبعاً كانت معانا .. زي ماقلت لنا يا دكتور شيلوا الغطا من على عين "جنى" بعد العملية بساعتين .. العيلة كلها كانت واقفة حوالين "جنى" .. انا وباباها واخوات "جنى" واخواتي انا  ومامتي جدة "جنى" .. بسم الله الرحمن الرحيم .. شيلنا الغطا .. لقينا البنت حاجة تانية خالص .. حاجة غير ..  انا بكيت من فرحتي ببنتي  ولقيتني باقول لماما .. خلاص يا ماما الحمد لله جنى ما بقتش حولة خلاص .. ربنا يخليك يا دكتور جمال ..

 ماما بقى يا دكتور تعبيرات وشها مش عارفة اوصفها لك .. مش مصدقة ... منبهرة .. مزدهلة .. حاجة كده

- ايه رأيك يا ماما ؟

- بصراحة يا بنتي .. انا ماكنتش مقتنعة... كنت باقول عملية ايه .. ما انا عشت طول عمري كده ..جرالي ايه يعني .. اتجوزت .. وخلفتكو.. وربيتكو .. وكبرتكو وجوزتكو ...  ده غير اني ما كنتش مصدقة ان فيه دكتور هيعرف يرجع عينيها زي ما كانت .. سبحان الله

بعديها بيومين لقيت "جنى" داخلة الأوضة عندي وبتوشوشني في ودني 

- فيه ايه يا جنى؟ .. مالها تيته ؟ مش سامعة حاجة .. علي صوتك شوية

 جنى ( بصوت عالي جداً ) بتسمع البيت كله  :

باقولك تيته عايزة تروح للدكتور جمال تعمل العملية زيي

بس يا جماعة ..  وبدأت القصة ....

د. جمــال صبــحي                            

 

 

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders