اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي للعين الضعيفة 6


    
 

 

حالة هذا الأسبوع ( 41 ) :  يارا مسعد جابر .. 14 سنة .. من سفاجة

الحول الوحشي والعين الكسلانة

أكتر حاجة يا جماعة بنخاف منها لما طفل يتولد عنده حول واهله – كعادتنا الغلط – قال ايه يخافوا عليه ويسيبوه لحد اما يكبر وبعد كده يروحوا للدكتور .. العين الحولة ياجماعة لو متعدلتش بدري نظرها بيضعف جداً .. ده اسمه " كسل وظيفي " .. وبنقول ساعتها جملتنا المشهورة جداً " عين بنتك بقت كسلانة يا مدام "

من اسبوعين كده جالي العيادة بنت لطيفة قوي من سفاجة ..  شكلها كده بتاعة تالتة اعدادي .. كان معاها باباها ومامتها

·       اهلا وسهلا .. خير يامدام

·       يارا يا دكتور جمال عندها حول وحشي في العين الشمال .. هي اتولدت كده .. احنا قلنا نستنى لما تكبر كده وبعدين نشوف حل في موضوع الحول ده

·       الحول بيبدل يا مدام ؟ .. يعني ساعات الشمال تحول وساعات اليمين ؟ ولا دايما الشمال هي اللي حولة ؟

·       لا يا دكتور .. اليمين مش بتحول ابداَ .. الشمال هي اللي حولة على طول

المهم .. قمت ياجماعة اكشف على يارا .. العين اليمين ستة على ستة .. العين الشمال الحولة لقيت نظرها ضعيف جداً جداً .. يدوبك شايفة العلامة الكبيرة بس .. يعني ستة على ستين

·       عين بنتك بقت كسلانة يا مدام

·       يعني ايه يا دكتور جمال ؟

العين لما تقعد حولة 14 سنة ياجماعة من غير مانعدلها .. بتحصل مشكلة كبيرة قوي .. احنا بنعتبر المشكلة دي أهم من الحول نفسه .. المشكلة دي اسمها الكسل الوظيفي .. زي اللي حصل مع يارا كده .. بقالها 14 سنة ياعيني بتبص قدامها بالعين اليمين بس .. والعين الشمال ياجماعة بتكون باصة في حتة تانية خالص .. المخ بتاعنا مينفعش يشوف صورتين .. بيتلخبط .. تفتكروا يعمل ايه مع يارا ؟ .. المخ مايلاقيش حل غير انه يبص لصورة العين اليمين بس ويريح نفسه .. وصورة العين الشمال الحولة اللي ملخبطاه يطنشها خالص .. كأنها مش موجودة .. تخيلوا ياجماعة 14 سنة والعين الشمال صورتها مش بتوصل للمخ .. طبعاً نظرها بيضعف جداً .. زي يارا كده .. عندها الشمال يدوبك بتشوف بيها العلامة الكبيرة بس

·       طيب والحل يادكتور جمال ؟

·       والله يافندم احنا معندناش أي مشكلة مع الحول .. أي حول ممكن يتعدل بالعملية ان شاء الله .. ده مش مشكلة خالص .. القصة كلها نص ساعة في اوضة العمليات والحول يتعدل .. المشكلة الصعبة عندنا دلوقتي في العين الضعيفة الكسلانة دي .. ازاي هنقدر ننشطها شوية ونحسن النظر فيها .. يارا كبيرة يا مدام .. التنشيط بيجيب نتايج كويسة عند اللي اصغر من 9 سنين .. بعد السن ده بنحول ننشط برضه .. بس ساعات النظر يتحسن وساعات لأ .. ؤبنا يسهل

·       طيب ولو النظر ماتحسنش ؟

·       خلاص يافندم .. الأمر لله .. يبقى هنعمل عملية الحول .. الشكل هيتحسن لكن النظر لأ .. لكن كان الأفضل ان احنا كنا شفنا يارا من زمان قبل الكسل ده ميحصل .. كان ساعتها نقدر نحسن النظر ونحسن الشكل

·       طيب يا دكتور جمال ؟ ننشط العين الكسلانة الأول ولا نعمل عملية الحول الأول ؟

·       والله يافندم في الاطفال الصغيرين اللي التنشيط بيجيب نتيجة سريعة معاهم بحب ابدأ الأول بالتنشيط .. شهرين تلاتة بالكتير العين الحولة نظرها بيتحسن وبعدين باعمل العملية .. انما في الكبار اللي التنشيط بياخد وقت طويل قوي بحب ابدأ بالعملية .. نعدل الحول .. وبعدين نحاول نحسن النظر

المهم عملت العملية ليارا من اسبوعين .. العين اتعدلت الحمد لله .. هنبدأ التنشيط الاسبوع الجاي ان شاء الله .. يا مسهل يا رب

شكراً يا مامة يارا ان حضرتك وافقتي انزل صورتها على صفحتي  في حالة هذا الاسبوع ..

  د. جمــال صبـــحي     

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders