اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي للعين الضعيفة 7


    
 

 

حالة هذا الاسبوع ( 63 ) خديجة عثمان .. 23 سنة .. من اسوان

الحول الوحشي للعين الكسولة

فتحت رسايل صفحتي من اسبوعين كده لقيت رسالة من خديجة .. البنت السمرا الطيبة دي زي كل اهل اسوان .. ودار بينا الحوار ده :

·       ازي حضرتك يا دكتور جمال .. انا خديجة من اسوان .. عايزة اسألك على حالتي

·       تحت امرك يا خديجة

·       انا عندي 23 سنة خريجة اداب قسم لغة عربية .. انا عندي حول وحشي في عيني اليمين .. الحول ظهر عندي وانا في ابتدائي زي ما فهمت من والدتي .. الحول مأثر على نفسيتي جداً .. هل ممكن الحول بتاعي يتعدل فعلاً بعملية

·       طبعاً يا بنتي أي حول ممكن يتعدل بعملية فعلاً

·       طيب انا كشفت عندنا والدكاترة قالوا لي ان عيني الحولة كسلانة جداً .. هي نظرها ضعيف جداً .. هل نظرها هيتحسن بعد العملية

·       بصي يا خديجة .. عمليات الحول مش بتأثر على النظر أبداً .. العين هتتعدل بالعملية .. لكن النظر في العين الكسلانة مش هيتحسن بالعملية .. انتي كبيرة يا بنتي والكسل عندك بقى له سنين طويلة وانتي سايباها .. لكن على العموم احنا بنحاول برضه بعد ما نعدل الحول اننا ننشط العين الكسلانة .. في سنك ساعات بتتحسن وساعات كتيرة لأ .. بس بنحاول .. ربنا يسهل

·       طيب يا دكتور جمال الكاترة قالوا لي برضه ان مادام العين ضعيفة .. فحتى لو عملتي العملية فالحول لازم هيرجع تاني

·       لأ طبعاً .. الكلام ده مش صح .. فيه حالات فعلاً يابنتي بعد مالحول بيتعدل بيرجع لهم تاني .. لكن مش كل الناس كده .. الغالبية العظمى من الحالات مش بيرجع لهم الحول ويعيشوا طول عمرهم عينيهم معدولة

·       طيب انا عايزة اعرف الحول هيرجع لي تاني ولا لأ

·       والله يا بنتي لايمكن نعرف .. انا بأعمل العملية للمريض بتاعي واتمنى من الله انه يكون من الغالبية العظمى اللي الحول مش هيرجع لهم .. لكن افرضي ان بعد كام سنة الحول رجع له تاني .... بأعمله العملية تاني ونعدل الحول برضه .. هنعمل ايه.. الأمر لله يابنتي .. هو الموضوع كده بمنتهى الصراحة

·       طيب انت رأيك ايه يا دكتور

·       بصي يا خديجة .. انا متعاطف جداً مع البنات اللي في سنك .. ودايماً اشجعهم يعملوا العملية .. مفيش حل تاني .. توكلي على الله يا بنتي

خديجة يا جماعة جت لي من يومين .. كشفت عليها في العيادة .. وعملت لها العملية تاني يوم الصبح .. جت لي تاني النهاردة بليل اطمن عليها .. الحمد لله رب العالمين .. نتيجة العملية حلوة قوي .. يارب تفضل كده على طول .. حمد الله على سلامتك يا بنتي

د. جمــال صبحي

 

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders