اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


الحول الوحشي للعين الضعيفة 8


    
 

حالة هذا الاسبوع ( 73 ) مصطفى عز الدين .. من سوريا

" الحول الوحشي للعين الكسولة "

فتحت رسايل صفحتي من اسبوعين كده لقيت رسالة من مصطفى .. شاب سوري قمة في الادب

·       ازي حضرتك يا دكتور جمال .. انا مصطفى من سوريا .. عايز اسألك على حالتي

·       تحت امرك يا درش

·       انا عندي 27 سنة طالب سوري بأدرس في مصر في جامعة المنصورة .. انا عندي حول وحشي في عيني اليمين جامد قوي.. عملت عملية قبل كده والحول رجع تاني .. الحول مأثر على نفسيتي جداً .. هل ممكن الحول بتاعي يتعدل فعلاً بعملية تانية زي ما حضرتك بتكتب على الصفحة بتاعتك

·       طبعاً يا درش أي حول ممكن يتعدل بعملية فعلاً حتى لو كنت عملت عملية قبل كده

·       طيب انا كشفت عندنا والدكاترة قالوا لي ان عيني الحولة كسلانة جداً .. نظرها ضعيف جداً .. هل نظرها هيتحسن بعد العملية ؟

·       بص يا درش .. عمليات الحول مش بتأثر على النظر أبداً .. العين هتتعدل بالعملية أكيد .. لكن النظر في العين الكسلانة مش هيتحسن بالعملية .. انت يا درش سنك كبير والكسل عندك بقى له سنين طويلة .. لكن على العموم احنا بنحاول برضه بعد ما نعدل الحول اننا ننشط العين الكسلانة .. في سنك ساعات بتتحسن وساعات كتيرة لأ .. بس بنحاول .. ربنا يسهل

·       طيب يا دكتور جمال الدكاترة قالوا لي برضه ان مادام العين ضعيفة .. فحتى لو عملت عملية تاني فالحول لازم هيرجع تاني

·       لأ طبعاً .. الكلام ده مش صح .. فيه حالات فعلاً بعد ما الحول بيتعدل ساعات بيرجع تاني .. لكن مش كل الناس كده .. الغالبية العظمى من الحالات مش بيرجع لهم الحول ويعيشوا طول عمرهم عينيهم معدولة

·       طيب انا عايز اعرف الحول هيرجع لي تاني ولا لأ

·       والله يا درش لايمكن نعرف .. انا بأعمل العملية للمريض بتاعي واتمنى من الله انه يكون من الغالبية العظمى اللي الحول مش هيرجع لهم تاني

·       طيب فيه دكاترة قالوا لي هيحصلك ازدواجية في الرؤية بعد العملية

·       ممكن طبعاً يحصل .. بس ده مش مهم .. دي بتبقى حاجة مؤقتة وتروح بعد شوية .. ده موضوع ما يقلقش خالص

·       طيب انت رأيك ايه يا دكتور

·       بصي يا درش .. انا متعاطف جداً مع الشباب اللي في سنك .. ودايماً اشجعهم يعملوا العملية .. مفيش حل تاني .. يعني عاجبك شكلك كده .. توكل على الله يا ابني

مصطفى جاني من المنصورة الاسبوع ده .. كشفت عليه في العيادة .. الحول جامد قوي فعلاً .. محتاج عملية في عينيه الاتنين مش العين الحولة بس .. مش ممكن الحول الجامد ده يتعدل بعملية في ناحية واحدة بس ..

المهم توكلنا على الله .. عملت لمصطفى العملية تاني يوم الصبح .. جه تاني النهاردة بعد اسبوع من العملية اطمن عليه .. الحمد لله رب العالمين .. نتيجة العملية حلوة قوي .. الحول اتعدل تماماً .. مفيش ازدواجية .. بيقول لي فيه تشويش بسيط محتمل .. يارب يا درش تفضل كده على طول .. حمد الله على سلامتك يا ابني وان شاء الله مايرجعش الحول تاني أبداً

د. جمــال صبحي

 

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders