اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


تفاصيل عملية الحول



    
 

 

حالة هذا الاسبوع ( 71 )

" حد عنده اسئلة عن عملية الحول ؟ "

 دي شوية اسئلة عن عملية الحول العيانين دايماً بيسألوني عليها

لو حد ياجماعة عنده سؤال مهم تاني عن العملية انا مش كاتبه .. يكتبه في التعليقات وانا هأعدل البوست وهاكتب سؤاله ضمن الاسئلة .. بس يكون السؤال يكون عن عملية الحول مش سؤال خاص عن نوع حول بعينه لأن ده انا غطيته في حالات هذا الاسبوع

·        هي عملية الحول بتكون ليزر ولا جراحة ؟

·        كتير من الناس فاكرين ان فيه عمليات حول بتتعمل بالليزر ..  طبعاً مفيش في أي مكان في العالم عمليات حول بتتعمل بالليزر ... عملية الحول بتكون عملية جراحية في عضلات العين 

·        العملية بتاخد وقت أد ايه ؟

·        عملية الحول بتاخد تقريباً ساعة

·        هي العملية ببنج كلي ولا بنج موضعي ؟

·        الاطفال بنج كلي .. والكبار ببنج موضعي

·        هنقعد بعد العملية في المستشفى أد ايه ؟

·        مش هتقعد اصلاً في المستشفى .. حضرتك  هتمشي بعد العملية بساعة تقريباً لو العملية بنج كلي .. وهتمشي بعد العملية على طول لو العملية بنج موضعي

·        فيه تحاليل اعملها قبل العملية ؟

·        لا مش لازم .. أي تحاليل أو فحوصات بتتعمل في المستشفى يوم العملية الصبح

·        بنحط غطا على العين بعد العملية ؟

·        الاطفال بالذات لما يصحوا بعد العملية ويلاقوا عينيهم الاتنين متغطية والدنيا ضلمة بيخافوا جداً ويقعدوا يصرخوا .. انا في الحقيقة مش باحط غطا على العين بعد العملية .. ساعات يعني باغطي عين واحدة .. بس مش باغطي الاتنين ابداً .. وحتى الغطا ده باقول للعيان يشيله بعد العملية بساعة كده 

·        ايه العلاج اللي بتكتبه بعد العملية ؟

·        العلاج بعد عملية الحول هو عبارة عن قطرة فقط لعلاج الاحمرار المؤقت اللي بيكون موجود بعد العملية

·        طيب بتكتب مسكنات بعد العملية ؟

·        بعد عملية الحول مفيش أي وجع .. مش بنكتب للعيان مسكنات خالص .. صحيح العيان بتكون عينه حمرا وبتدمع لكن مش بتوجع

·        ابني لسه صغير لو بعد العملية دعك في عينه أو اتخبط فيها هيحصل حاجة ؟

·        مش هيحصل أي حاجة .. سيبيه يتحرك ويلعب عادي خالص

·        ابني عمل العملية النهاردة الصبح ولحد دلوقتي مش عايز يفتح عينيه ؟

·        عادي يافندم كل الاطفال كده .. بيكونوا مضايقين شوية أول يوم وخايفين يفتحوا .. بكره الصبح هيفتح عينيه عادي

·        ههي العين الحولة الضعيفة وفيها كسل .. ينفع اعملها عملية حول؟

·        طبعاً ينفع .. بس العملية عشان نعدل الحول مش عشان نعالج الكسل

·        انا عملت عملية حول قبل كده والحول رجع .. ممكن اعمل عملية تاني ؟

·        طبعاً ممكن يافندم .. عادي مفيش مشكلة

·        هي نتيجة العملية بتظهر امتى ؟

·        بعد العملية على طول بيبان ان العين اتعدلت خلاص ومفيش حول

·        هو بعد العملية نظري هيتحسن ؟

·        عملية الحول بتعدل الحول مش بتحسن النظر .. النظر هيفضل هو هو .. بعد العملية زي قبل العملية مفيش تغيير

·        هو بعد العملية ألبس نضارتي عادي ولا اعمل مقاس نظارة جديد ؟

·        لأ مقاس النظارة مش بيتغير بعد العملية .. البس نضارتك عادي

·        انا كنت باستخدم عسات لاصقة .. اقدر البسها بعد العملية بكام يوم ؟

·        مينفعش ابداً نلبس العدسات اللاصقة الا بعد العين ماتهدى خالص ويروح الاحمرار .. يعني قدامك اسبوعين تلاتة كده .. البسي النضارة دلوقتي وبلاش العدسات

·        ممكن بعد العملية اروح المصيف .. انزل البيسين .. العب رياضة .. اروح الجيم .. اتفرج على التليفزيون .. ابص للموبايل .. اقعد على الكمبيوتر ؟

·        الرد باختصار .. بعد عملية الحول مفيش أي حاجة ممنوعة .. تقدر تعمل أي حاجة انت عايزها

·        بعد العملية آخد اجازة من الشغل كام يوم ؟

·        عمليات الحول بتتعمل في عضلات العين مش يتتعمل في العين نفسها .. يعني مش زي عمليات الميه البيضاء والميه الزرقاء على سبيل المثال اللي بتتعمل جوه العين .. العمليات دي بتحتاج فعلاً اجازة من الشغل ..  عملية الحول مش كده .. دي بتكون في العضلات الموجودة خارج العين .. عشان كده يقدر العيان بعد العملية مباشرة ممارسة حياته الطبيعية ولا يوجد طبياً أي موانع للعيان اللي عمل عملية حول من ممارسة عمله والعودة لنشاطه الطبيعي في اليوم التاني أو التالت من العملية .. بس العيان لازم يعرف ان عينه هتكون حمراء لفترة اسبوعين أو ثلاثة وبيقل الاحمرار ده بالتدريج وبيختفي تماماً بمرور الوقت

·       ايه اصغر سن بتتعمل فيه عملية الحول ؟

·       طبياً .. نقدر نعمل عملية حول لبيبي عنده 4 شهور

·        انا عندي 40 سنة .. ينفع اعمل عملية حول في السن ده ؟

·        طبعاً ينفع .. عملية الحول بتتعمل في أي سن .. مفيش أي مشكلة

·        ممكن البس نظارة شمس لحد اما الاحمرار ده يروح ؟

·        طبعاً ممكن .. مفيش أي مشكلة

·        انا مش من القاهرة .. يكفيني كام يوم في مصر عشان اعمل العملية وارجع بلدي تاني ؟

·        يكفيك جداً 4 ايام .. يوم اشوفك في العيادة .. وتاني يوم نعمل العملية .. واطمن عليك بعد العملية بيومين كده .. وبعدين تسافر بالسلامة

د. جمــال صبحي  

 

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders