اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


اسئلة عن  عملية الحول



    
 

حالة هذا الأسبوع ( 92 ) ميرفت عطا .. 20 سنة .. من اسيوط

" الحول الوحشي للعين الضعيفة "

أول كلمة قالتها ميرفت لما دخلت عندي العيادة النهاردة

" دكتور جمال .. هو مفيش علاج للحول ده غير العملية ؟؟ "

طيب بما ان السؤال ده بيتكرر عندي كل يوم .. ده معناه ان الناس خايفة من عملية الحول .. انا مش ه اتكلم النهارده عن حالة الحول الوحشي اللي عند ميرفت واللي فعلاً ملوش علاج إلا العملية .. وهي فعلاً عملت العملية خلاص وبقت زي القمر .. لأ .. انا عايز اتكلم النهاردة عن تفاصيل عملية الحول اللي الناس كلها خايفة منها .. لدرجة إني ساعات باشوف آنسات وشباب في سن ميرفت راضيين يعيشوا بالحول ده وبالمنظر ده عشان خايفين يعملوا العملية

عملية الحول يا جماعة بتتعمل في عضلات العين مش بتتعمل في العين نفسها .. يعني مش زي عمليات الميه البيضاء والميه الزرقاء على سبيل المثال اللي بتتعمل جوه العين ..  عملية الحول مش كده خالص .. دي بتكون في العضلات الموجودة بره العين .. يعني ملهاش دعوة بالعين ومش بتأثر على العين أبداً .. العملية بتاخد تقريباً ساعة .. وعشان العملية مش في العين نفسها فالعيان بعد العملية يقدر على طول يرجع لحياته الطبيعية .. بس لازم يعرف ان عينه هتكون حمراء لفترة اسبوعين أو ثلاثة وبيقل الاحمرار ده بالتدريج وبيختفي تماماً بمرور الوقت .. وانا عندي جملة مشهورة قوي باقولها لكل العيانين بعد العملية " مفيش أي حاجة ممنوعة " .. لدرجة كل الناس في المستشفى حافظين الجملة دي .. مجدي عامل الاسانسير .. وتامر بتاع الأمن .. وأم دينا عاملة العمليات .. لما حد منهم يعدي عليا وانا باكلم العيان بعد العملية تلاقيه بيقول وهو بيضحك " مفيش أي حاجة ممنوعة "

 فيه حاجة كمان .. كتير من الناس فاكرين ان فيه عمليات حول بتتعمل بالليزر ..  طبعاً مفيش في أي مكان في العالم عمليات حول بتتعمل بالليزر لا في مصر ولا بره مصر .. عملية الحول بتكون عملية جراحية في عضلات العين زي ما قلت لكم ..

الاطفال بيعملوا العملية ببنج كلي .. والكبار ببنج موضعي وساعات الكبار ببنج كلي برضه .. والعيان بيمشي من المستشفى بعد العملية بساعة تقريباً  لو العملية بنج كلي .. وبيمشي بعد العملية على طول لو العملية بنج موضعي

انا في الحقيقة مش باحط غطا على العين بعد العملية .. ساعات يعني باغطي عين واحدة .. بس مش باغطي الاتنين ابداً .. وحتى الغطا ده باقول للعيان يشيله بعد العملية بساعة كده  ويبتدي ياخد العلاج وهو عبارة عن قطرة وكمادات مية دافية بس .. وبعد عملية الحول مفيش أي وجع .. خالص ..  مش بنكتب للعيان أي مسكنات .. صحيح العيان أول يوم بتكون عينه حمرا وبتدمع لكن مش بتوجع

ميرفت سألتني كل الاسئلة دي وانا جاوبت عليها نفس الاجابة اللي باقولها لكل العيانين واللي حبيت النهاردة اكتبها لكم عشان لو أي حد منكم عنده استفسارات زي دي عن عملية الحول

د. جمــال صبـــحي

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders