اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


ازدواج الرؤية بعد عملية الحول



    
 

 

حالة هذا الأسبوع ( 36 ) :

" ازدواج الرؤية بعد عملية الحول "

أول ماروحت البيت يا دكتور جمال وشلت الغطا من على عيني .. لقيتني باشوف الحاجة اتنين

النهاردة يا جماعة هاتكلم عن موضوع حساس جداً ولازم المرضى اللي عندهم حول يعرفوه.

 انا عارف ان الموضوع ده بيخوف كتير من العيانين اللي عايزين يعملوا عملية الحول .. لكن حق كل مريض انه يعرف ايه اللي محتمل يحصل بعد مايعمل عملية الحول وايه ابعاده.

في بعض انواع الحول – واحب اكررها تاني يا جماعة – في بعض انواع الحول خصوصاً الحول الوحشي المتقطع والتبادلي .. المريض بعد العملية ساعات بيشوف الحاجة اتنين .. برغم ان العملية بتكون جميلة جداً والحول بيكون اختفى تماماً فسبب الازدواج ده شرحه يطول لكن هو عشان مركز الرؤية في الشبكية اخد وضع جديد مع استقامة العينين بعد العملية وكده .. المهم ازدواج الرؤية ياجماعة بعد عملية الحول بيكون ازدواج بسيط جداً مش ملحوظ وبيكون ازدواج مؤقت بيختفي تماماً في أول اسبوع من العملية .. ده الموضوع ببساطة شديدة عند مايقرب من 99% من المرضى.

لكن في الحقيقة ياجماعة فيه مرضى تانيين الازدواج عندهم بيكون مزعج جداً جداً لدرجة انهم بيقولوا لي انهم بيشوفوا الحاجة اتنين فعلاً .. بعضهم مايقدرش يقرأ أو يبص في الموبايل .. المهم لما بيكون الازدواج جامد قوي كده بننصح المريض انه يغطي عينه اليمين يوم وعينه الشمال يوم .. بالتبادل كده لحد الازدواج مايروح بعد كام يوم .. معظم المرضى اللي بيعملوا كده بيروح الازدواج من عندهم في خلال ايام .. بعضهم بيطول شوية ويستمر الازدواج معاهم لمدة اسبوعين ويختفي .. المهم الازدواج في النهاية بيختفي ..

بعض المرضى القليلين جداً جداً .. ودول انا فاكرهم بالاسم من ضمن الاف المرضى .. دول ياجماعة فضل عندهم الازدواج لمدة 3 شهور رغم تغطية العين بالتبادل وكان الحل النهائي ليهم هو عمل نوع معين من النظارات بتعالج الازدواج .. وحتى الشوية القليلين دول اللي عملتلهم النظارات دي معظمهم اختفى من عندهم الازدواج برضه في النهاية.

 انا عارف ان الكلام في موضوع الازدواج ده بيخوف كتير من العيانين انهم يعملوا عملية الحول .. لكن حق العيان انه يعرف كل المعلومات بصدق ويطلع على ابعاد المشكلة ويعرف سببها وبتقعد قد ايه وبتختفي امتى واذا لم تختفي بنعالجها ازاي وكده.

د. جمــال صبـــحي

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders