اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


احمرار العين بعد عملية الحول



    
 

 

حالة هذا الاسبوع ( 68 ) جلال .. 19 سنة .. من اليمن

اسئلة شائعة " الاحمرار ده بيختفي بعد كام يوم ؟ "

العيانين بتوعي دايماً وراهم حكايات .. بحب اسمعها قوي .. حكاياتهم تقريباً مع انها مختلفة لكن شبه بعض .. حكاياتهم رقيقة وجميلة .. كلهم صحيح جايين يعملوا عملية الحول .. لكن كل واحد منهم عنده الحدوتة بتاعته .. واحد عنده فرصة مش هتتعوض .. مقابلة عمل طول عمره منتظرها .. ودي بنوتة فرحها قرب وعايزة صورها تبقى "واو" وكده .. والانسة دي جاي لها شغل في الخارجية وطبعاً مينفعش الكلام ده .. والاستاذ رايح يخطب ومرعوب من حماته .. وده مسافر بره وعنده كشف طبي مهم وعايز يعدي .. يعني حاجات كتيرة قوي ملهاش آخر .. كل مريض عنده حكاية شكل .. يعني مثلاً انا لسه عامل عملية لبنت مسافرة الكويت بعد اسبوعين بفستان الفرح .. عريسها يبقى ابن عمها .. هينتظرها هناك في المطار مع صحابه وهيعملوا لها زفة مصري محصلتش .. تصدقوا بعد العملية كل يوم اكلمها .. الأخبار ايه النهارده ؟ .. طيب ابعتيلي صورة على الخاص كده .. انا خايف ييجي ميعاد سفرها وعينها لسه حمرا .. أخيرا بعد 13 يوم بعتت صورة مفيش احمرار خالص وعينها فتحت وبقت طبيعية .. يعني مع شوية مسكرة ومكياج والحاجات دي هتبقى قمر .. هي رفضت انزل صورها في حالة هذا الاسبوع لكن زمانها بتقرا الكلام ده وعارفة نفسها

طيب .. عشان موضوع الاحمرار ده اللي لازم بيحصل بعد عمليات الحول .. انا بقى متعود اسأل العيانين على المواعيد بدقة شديدة .. امتى الكلام ده ؟ .. يوم ايه ؟  .. المفروض نتكلم عن الاحمرار ده قبل العملية مش بعد العملية .. عشان كل واحد يرتب حاله ..

شوفوا يا جماعة .. العين بتكون حمرا جداً بعد العملية .. ده عادي .. كل العيانين كده .. عادي جداً والله .. محدش يروح البيت بعد العملية ويبص في المرايا يتخض من شكله .. طبعاً العين حمرا .. مش عملية ياجماعة .. طيب امتى شكلها يرجع طبيعي .. طبعاً الموضوع بييجي بالتدريج .. شوية شوية .. بعد اسبوع تقريباً العين بتبقى 50% معقولة .. يعني نقدر نقول كده ان العين بيرجع شكلها طبيعي خالص بعد اسبوعين تقريباً من العملية .. ساعات بتاخد أقل من اسبوعين شوية .. وساعات أكتر من اسبوعين شوية

جلال عمل العملية من يومين .. طبعاً عينه لسه حمرا .. انا قلت له كده قبل العملية .. قلت له الاحمرار مش مهم خالص يا جلال .. المهم بعد العملية نتأكد ان مفيش حول .. ده هو المهم .. ده اللي بيحدد نجاح العملية ..  الاحمرار هيختفي طبعاً بالتدريج .. شوية شوية زي ماتفقنا قبل العملية ..  تقدر ترجع اليمن دلوقتي وانت مطمئن ونتراسل على الفيس وتبعت لي صورة كل شوية نشوف الاخبار ايه

حمد الله على سلامتك يا استاذ وألف مبروك

د. جمــال صبحي  

 

 




الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders