اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية



 

 

طيب عشان نفهم اجابة السؤال ده لازم اكلمكم الأول عن حول اسمه  " حول طول النظر " .. أو ساعات الدكاترة يسموه " الحول التكيفي "

الحول ده حول انسي يعني العين بتخش لجوه ..  بيظهرعند الاطفال اللي عندهم طول نظر..  ساعات بيحصل فجأة .. وساعات بالتدريج شوية الولد يحول وشوية يتعدل .. وكده يعني

الموضوع ان كتير من الاطفال اللي عندهم طول نظر عينيهم تحول لجوه كده .. وعادة لما الولاد دول نعمل لهم نضارة نلاقي الحول اتعدل تماماً وخلصت المشكلة .. بالبساطة دي .. اه بالبساطة دي

 بس مش كل الاطفال دول بيحصل معاهم كده .. وده سبب السؤال اللي كل شوية افتح الرسايل ألاقيه

" بس أنا يا دكتور ابني لقينا عنده طول نظر وعملنا له نضارة .. النضارة عدلت الحول بس مش قوي نعمل ايه ؟

طيب فيه هنا حتة مهمة عايز اقولها الأول .. مفيش حاجة ياجماعة اسمها الحول اتحسن قوي .. ولا انا ابني عنده حول خفيف ولا بنتي عندها حول بسيط ولا عينه حولة بس مش قوي ولا أي كلام تاني من اللي بتقولوه ده .. الحول حول ياجماعة .. بسيط ولا مش بسيط .. برضه حول .. وبرضه العين الحولة حول بسيط دي نظرها هيضعف .. وبرضه العين الحولة حول خفيف دي هيحصل فيها كسل .. زيها زي أي عين حولة .. افتكروا دايماً كلمتي دي .. " الحول حول ياجماعة "

يبقى مفيش حاجة اسمها النضارة عدلت الحول بس مش قوي .. لأ طبعاً المشكلة لسه زي ماهي .. والحول طبعاً لسه ما اتعالجش

طيب نجاوب السؤال بتاعنا بقى احسن انا طولت عليكم

بمنتهى البساطة الحول ده ياجماعة اللي اتعدل بالنضارة بس مش قوي مش كله بيكون بسبب طول النظربدليل ان النضارة بتعدل شوية حول وتسيب شوية .. فالحل هنا اننا نعمل عملية عشان الشوية اللي فاضلين دول  بس برضه هنفضل لابسين النضارة .. يعني بنعالج الحول شويةِ بالنضارة وشوية بالعملية

 

الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders