اتصل بي اسئلة شائعة استشارات مجانية حالة هذا الأسبوع انواع الحول معلومات تهمك الصفحة الرئيسية


اعرف منين عمليتي نجحت ولا لأ ؟



 

 

" النقطة البيضا وال سمارت فون "

قبل اختراع الموبيلات الجديدة واكتشاف النقطة البيضا دي يا جماعة كنت باتعب جداً عشان أرد على الاسئلة دي:

·       انا عملت العملية امبارح يا دكتور بس لسه حاسس ان عيني فيها حول ؟

·       اصحابي بيقولوا عيني لسه حولة وحضرتك بتقول لأ مفيش حول ؟

·       والنبي صارحني يادكتور العملية بتاعتي نجحت ولا لأ ؟

·       عايزة اعرف ابني عنده حول ولا لأ ؟

·       رحت لدكاترة كتير بس كلهم قالوا ان ده حول كاذب ؟

 

طيب .. اشرح لكم موضوع النقطة البيضا وازاي ريحتنا .. وازاي ريحت المريض نفسه وعرفته ازاي يعرف لوحده هل عنده حول ولا لأ .. من غير حتى ما يسأل الدكتور

ايه موضوع النقطة البيضا دي يا جماعة

في منتهى البساطة .. امسك الموبايل .. شغل الكاميرا .. شغل الفلاش .. امسك الموبايل قدامك على طول .. بص قدامك مش للجنب .. التقط صورة بالفلاش وانت باصص قدامك على طول .. اخدت الصورة خلاص .. اسمع بقى

ازاي تعرف في البيت لوحدك أن العين فيها أي حول حتى لو بسيط ولا مفيش
بصوا يا جماعة على الصورة .. كبروا الصورة .. كبروا كمان
بصوا على النقطة البيضا الصغيرة اللي هي انعكاس الفلاش على العين .. بصوا عليها كويس وشوفوا النقطة البيضا موجودة فين

لو النقطة البيضا موجودة في وسط النني في عين .. بس مش في وسط النني في العين التانية .. يبقى فيه حول .. قولاً واحداً

ولو النقطة البيضا دي موجودة في وسط النني بالظبط في العين اليمين وبرضه في وسط النني بالظبط في العين الشمال يبقى مفيش أي حول .. قولاً واحداً برضه . . مفيش حول يعني مفيش حول .. ما دام النقطة البيضا في وسط النني يبقى خلاص .. مينفعش بعد كده نقول بس انا حاسس أن عيني دي داخلة لجوة شوية .. ولا نقول عيني دي فيها حول شوية .. ولا نقول اصحابي بيقولوا ان عيني لسه فيها حول .. ولا ييجي عيان يقول لي هي عمليتي ناجحة يا دكتور جمال ؟  .. شوف انت بنفسك .. مش لازم انا اقول لك .. شوف النقطة فين واحكم بنفسك ..

خلاص يا جماعة .. الموضوع واضح كده .. واضح ازاي تعرف أو تعرفي عمليتك ناجحة ولا لأ .. واضح ازاي تعرفي ابنك عنده حول ولا لأ ..

العيانين بتوعي باقعد معاهم قبل العملية اعلمهم موضوع النقطة البيضا دي .. ودايماً وانا بأرد على تليفوناتهم بعد العملية معنديش غير كلمة واحدة:

" النقطة البيضا فين يافندم ؟ "

الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders