حالة هذا الأسبوع ( 85 ) الحاج حسن .. 66 سنة  من البحيرة

" شلل العصب الثالث "

احنا عارفين من قبل كده ان العين بيحركها 3 اعصاب طالعة من المخ .. العصب التالت والعصب الرابع والعصب السادس .. طبعاً كلهم مهمين .. بس أهم واحد فيهم هو العصب التالت .. ليه ؟ .. العصب التالت بيحرك لوحده اربع عضلات من العضلات الستة اللي بتحرك العين .. والعصب التالت برضه هو اللي بيحرك العضلة اللي بترفع الجفن لفوق .. يعني هو اللي بيخلي العين تفتح ..  
وعشان كده لما بيحصل شلل في العصب التالت بنلاقي العين مش بتتحرك تقريباً في أي اتجاه لأن فيها اربع عضلات مش شغالين .. فالعين بيكون فيها حول وحشي وبتكون ثابتة في مكانها ..  يدوبك بتتحرك حاجة بسيطة جداً .. تخيلوا ياجماعة .. اربع عضلات مش شغالة من مجموع ست عضلات ..  وبنلاقي حاجة كمان مهمة جداً في العيانين دول .. بنلاقي العين مقفولة مش بتعرف تفتح ..  
طيب ايه هي اسباب شلل العصب الثالث عند الكبار؟

 أهم الاسباب هي مرض السكر وارتفاع ضغط الدم واصابات الرأس في الحوادث وبعض امراض المخ

وعشان العصب التالت طالع من المخ  فدايماً أول حاجة بنعملها لما نشوف العيانين دول .. اننا بنخليهم يعملوا اشعة على المخ عشان نتأكد الأول ان المخ سليم ..

شلل العصب التالت لما بيكون سببه مرض السكر أو ارتفاع ضغط الدم .. بيكون شلل مؤقت .. ومعظم العيانين بيكونوا محظوظين وبيخفوا لوحدهم في خلال 6 شهور من العلاج مع تظبيط السكر والضغط  .. وبترجع عينيهم تفتح تاني وتتحرك طبيعي خالص

يتفضل شوية حالات قليلة مش بتخف بالعلاج .. دول بيكون علاجهم عمليتين .. عملية للعين عشان الحول وعملية تانية عشان ارتخاء الجفن
وعشان العين بيكون فيها حول وحشي جامد ومش بتتحرك .. فالعملية بيكون الغرض منها هو تثبيت العين في الوضع الامامي عشان العيان يعرف يبص قدامه ويتعامل مع الناس ويتفرج على التليفزيون والموبايل ويقرأ وكده .. لكن للأسف .. حتى بعد العملية العين برضه مش بتتعرف تتحرك لمعظم الاتجاهات

الحاج حسن الحمد لله كان من العيانين المحظوظين .. جالي من البحيرة من حوالي 6 شهور .. عينه مقفولة خالص بالمنظر ده ولما رفعت الجفن بصباعي .. لقيت العين فيها حول وحشي ومش بتتحرك .. الحاج حسن عنده شلل في العصب التالت واضح جداً

المهم .. طلبت اشعة على المخ وتحليل السكر وكشف باطني عشان نشوف ضغط الدم .. اشعة المخ طلعت سليمة والحمد لله .. لكن الضغط والسكر عاليين .. عم حسن قعد 6 شهور على علاج العصب التالت مع ظبط السكر والضغط .. فضل يتحسن شوية بشوية لحد أما رجع طبيعي تماماً بالعلاج الطبي بس ومن غير أي عمليات..

دي صورته آخر مرة كان عندي .. الحمد لله ياحاج .. بقيت زي الفل .. حمد الله على سلامتك .. بس من فضلك ابقى اهتم شوية بأدوية الضغط والسكر وربنا يوفقك

د جمــال صبحي