حالة هذا الاسبوع

حول طول النظر ( الحول التكيفي )

الحول ده بيظهر فجأة عند الاطفال اللي عمرهم من سنتين لأربع سنين .. ساعات بيظهر قبل كدة وساعات بيظهر بعد كدة .. الاطفال دول بيتولدوا طبيعيين تماماً ويكبروا وهما عشرة على عشرة .. يمكن لحد مايخشوا المدرسة .. فجأة عينيهم تحول لجوة .. حول انسي يعني .. الأب والأم بيتخضوا جداً وألاقيهم جايين لي جري ..الحقنا يا دكتور جمال .. بنتي كانت زي الفل لحد النهاردة الصبح .. رجعت من المدرسة النهاردة حولة كدة .. الحقنا يا دكتور .. ايه اللي حصل .. عايزة بنتي ترجع طبيعية زي الاول ..

اشرح لكم بقى ايه اللي حصل :

كتير من الاطفال اللي عندهم طول نظر بيحصل لهم الحول ده  .. عينيهم تحول لجوة زي ن. كدة ... عشان كدة بنسميه حول طول النظر .. يعني لو عالجنا طول النظر الحول يتعدل لوحده .. فلما بنكشف على الولاد دول ونعمل لهم نضارة عشان نعالج طول النظر .. نلاقي العين تتعدل فوراً لما يلبسوا النضارة ..

تبقى المشكلة دلوقتي ايه ؟

البنت تلبس النضارة عينها تتعدل .. تقلع النضارة عينها تحول .. معقول الكلام ده يا دكتور .. حتفضل طول عمرها كدة ؟؟

لأ طبعاً .. طول النظر يا جماعة عند الاطفال دول بيفضل يتحسن ويقل شوية بشوية .. والنضارة طبعا يفضل مقاسها يقل ويتحسن برضه شوية بشوية .. لحد ما ييجي وقت نلاقي مفيش طول نظر خلاص ..فيخف الحول طبعاً .. وساعتها نبطل نلبس النضارة

بس أنا يا دكتور بنتي مش كدة ؟؟

لقينا عندها طول نظر وعملنا لها نضارة لكن الحول فضل زي ما هو .. ايه الحل ؟؟

خلاص يافندم ما دام النضارة معملتش حاجة يبقى ده مش حول طول نظر .. يبقى علاجه عملية مش نضارة

وأنا يا دكتور برضه بنتي مش كدة ؟؟

لما لبست النضارة الحول اتعدل بس مش قوي .. لسه عندها شوية حول كدة .. نعمل ايه ؟؟

يبقى يافندم الحول اللي عندها مش كله بسبب طول النظر .. الحل هنا اننا نعمل عملية عشان الشوية اللي فاضلين دول ونفضل لابسين النضارة برضه .. يعني نعالج الحول شوية بالنضارة وشوية بالعملية

وأنا يا دكتور بنتي برضه مش كدة ؟؟

كل ما تكبر شوية واروح لدكتور يقول لي طول النظر زاد مش قل .. ونغير النضارة بمقاس اكبر .. لحد ما كبرت خالص .. بقت آنسة يعني .. لا الحول خف .. ولا طول النظر قل .. وكل ماتقلع نظارتها يبان الحول وبتبقى محرجة جداً مع اصحابها .. ممكن اعمل لها عملية الحول ؟؟

طبعاً لأ مش ممكن .. الولاد اللي الحول بتاعهم بيختفي مع النظارة .. وكبروا وهما كدة .. علاجهم انهم يعملوا عملية ليزك عشان نعالج طول النظر اللي عندهم .. مش عملية حول .. لما يعملوا الليزك بيبقوا كأنهم لابسين نضارة بالظبط .. يعني الحول بيروح من عندهم أول ما يعملوا الليزك

د. جمــال صبحــي