· 

حالة هذا الاسبوع ( 204 )

" كل أما تقلع النضارة الحول يبان .. ايه الحل ؟ "

النهارده يا جماعه هأكلمكم عن حول طول النظر .. الحول ده من أشهر انواع الحول عند الأطفال .. كل يوم لازم اشوف في عيادتي أطفال عندهم حول طول النظر .. وكل يوم افتح رسايل الصفحة ألاقي بدون مبالغة عدة عشرات من الأمهات بيسألوني عن نفس الحول ده .. كلهم بيسألوا نفس الأسئلة بالظبط .. وكل الأمهات بيشوفوني وانا بأجاوب نفس الأسئلة كل يوم .. لكن لازم هما كمان يسألوني نفس الأسئلة عن أطفالهم .. فاكرين اني هأرد عليهم رد مختلف .. لكن بيلاقوا برضه نفس الإجابة .. أسئلة كتيره قوي وكلها لها إجابة واحدة

طيب نشوف الأسئلة الأول  

- ( بنتي عندها سنة وظهر عليها حول فجأة .. عينها بدأت تخش لجوه .. رحت لكذا دكتور كلهم قالوا ان عندها طول نظر وهو ده اللي عامل الحول .. وكلهم قالوا علاجها نضارة .. ملهاش علاج إلا النضارة .. أكيد فيه حل تاني غير النضارة  .. صح يا دكتور ؟ )

- ( معقول يا دكتور جمال .. بيبي في السن ده هنعرف نلبسها نضارة .. هي نفسها مش هترضى تلبس النضارة .. دي عصبية جداً ومش هتسيبها على وشها .. دي هتكسرها كل شوية .. شوف أي حل تاني يا دكتور .. ممكن نعملها تصحيح نظر بالليزك ؟ )

- ( بنتي لابسه النضارة من 4 سنين ومفيش أي تحسن .. كل أما تقلع النضارة الحول يبان .. تلبس النضارة الحول يروح .. ايه الحل .. هتفضل كده لحد إمتى ؟ )

علشان نتكلم عن الحل لازم نتكلم الأول عن حول طول النظر

" حول طول النظر "

كتير من الأطفال اللي عندهم طول نظر بيحصل لهم حول انسي .. يعني عينيهم تنحرف للداخل وده بيحصل عادة من عمر سنة لحد عمر أربع سنين تقريباً .. ساعات يحصل قبل كده وساعات بعد كده .. الحول ده اسمه ياجماعه حول طول النظر .. يعني طول النظر هو اللي عملهم الحول .. وعشان نعالج الحول لازم طبعاً نعالج طول النظر .. وعلاج طول النظر في السن دي زي ما كلنا عارفين هو النضارة

والأطفال اللي عندهم حول طول النظر 3 انواع .. كل أب وأم لازم يعرفوا ابنهم من النوع الأول ولا من النوع التاني ولا من النوع التالت عشان يعرفوا طريقة العلاج :

1. النوع الأول : لما الطفل يلبس نضارة عشان نعالج طول النظر اللي عنده نلاقي الحول اختفى تماماً .. ولما يقلع النضارة الحول يظهر .. يبقى خلاص الطفل ده علاجه نضارة مش عملية حول .. وكل 6 شهور نشوف مقاس النضارة اتغير ولا لأ .. معظمهم نلاقي كل شويه طول النظر بيقل عن الأول .. ويفضل يقل شويه بشويه لحد ميبقاش عنده طول نظر خالص ويستغنى عن النضارة وطبعاً ساعتها مايبقاش فيه حول .. الولاد دول بيستغنوا عن النضاره على سن 10 أو 12 سنه بالكتير.

2. النوع التاني: برضه لما الطفل يلبس النضارة نلاقي الحول اختفى تماماً .. ولما يقلع النضارة الحول يظهر .. لكن لما بنشوفه كل 6 شهور نلاقي طول النظر مش بيقل ولا حاجه .. يعني الطفل هيفضل يلبس النضارة على طول عشان الحول مايظهرش .. الولاد والبنات دول اللي كبروا وطول النظر اللي عملهم حول لسه موجود مش معقول يعيشوا طول عمرهم بالشكل ده .. يلبسوا النضارة مفيش حول .. يقلعوا النضارة يبقى فيه حول .. لأ طبعاً لما يكبروا مش بنسيبهم كده .. دول بنعمل لهم ليزك أو تصحيح ابصار على سن 18 سنه مش قبل كده .. لأن ممنوع طبياً منعاً باتاً عمل ليزك بدل النضارة قبل سن 18 سنه لخطورته على عيون الأطفال .. ولما يعملوا ليزك ساعتها يبقى خلاص مفيش طول نظر .. يعني مفيش نضارة وطبعاً يبقى برضه مفيش حول

3. النوع التالت: لما الطفل يلبس النضاره نلاقي الحول لسه موجود .. أو نلاقي الحول قل شويه بس لسه موجود .. ومادام الحول لسه موجود حتى لما نلبس النضارة .. يبقى خلاص مفيش حل تاني للحول إلا عملية حول .. بس برضه بعد العملية هيلبس النضارة عشان طول النظر .. زيه زي أي حد عنده طول نظر ومحتاج نضارة عشان يشوف كويس وعشان كمان لو مش هيلبس نضارة بعد العملية طول النظر هيعمله حول تاني

البنت العسولة حالة النهاردة طلعت من النوع الأول .. يعني لما تلبس النضارة الحول بيختفي تماماً .. طبعاً النوع ده علاجه نضارة مش عملية .. وكل 6 شهور نشوف النضارة محتاجه تتغير ولا لأ .. وهي كده تبقى اتعالجت فعلاً .. لأن الحول خلاص اتعدل .. مفيش حاجه اسمها بس أما تقلع النضارة الحول بيبان .. ده مش مهم أبداً .. المهم ياجماعه وهي لابسه النضارة ميكونش فيه حول

د. جمــال صبـــحي