حالة هذا الأسبوع ( 231 ) احمد محمد مصري .. سنة و4 شهور .. من أسوان

( عملنا النضارة لأحمد يا دكتور جمال والحول لسه زي ما هو .. ايه الحل ؟ )

السؤال ده ياجماعة كل يوم افتح رسايل الصفحة لازم ألاقيه على الأقل ييجي 10 مرات

طيب .. هو ايه الموضوع ؟

كتير من الاطفال اللي عندهم طول نظر بيحصل لهم الحول ده .. عينيهم تحول لجوه زي " احمد " كده ... عشان كده بنسميه حول طول النظر .. وكتير بنلاقي الحول يتعدل فوراً لما يلبسوا النضارة .. بس مش كل الاطفال دول بيحصل معاهم كده .. بعضهم نعمل لهم نضارة ونلاقي الحول زي ماهو .. زي " احمد " كده .. عملت له نضارة بس لما لبسها برضه كان عنده حول .. بنعرف ساعتها ان مش طول النظر بس هو اللي عملهم الحول .. يعني النضارة لوحدها مش ممكن تعدل لهم الحول .. الولاد دول بيحتاجوا حاجتين مع بعض .. عملية ونضارة .. لازم الحاجتين مع بعض .. يعني لازم احمد يعمل عملية ولازم برضه بعد العملية يلبس النضارة

المهم عملت العملية لأحمد من شهر تقريباً ..  النهاردة بعتوا لي صورة احمد من اسوان .... عمليته زي الفل .. الحمد لله رب العالمين مفيش حول خالص .. كل 6 شهور هنتابع مقاس النضارة لحد أما يكبر وطول النظر يروح من عنده على سن 10 سنين كده وساعتها يقدر يقلع النضارة

الف حمد الله على سلامتك يا حبيبي  

د. جمــال صبحــي