حالة هذا الأسبوع ( 228 )  محمد سالم صدام .. وفاطمة سالم صدام .. 8 سنين و7 سنين .. من العراق

" هل الحول مرض وراثي ؟ "

دايماً اتسأل السؤال ده لما بشوف اخوات من نفس الأسرة عندهم حول ..

مش شرط يا جماعة ان أخ وأخته عندهم حول يبقى الحول اللي عندهم لازم يكون حول وراثي .. خالص .. زي ما احنا عارفين ان انواع الحول كتيرة جداً .. من الأنواع دي فيه فعلاً انواع حول وراثية بتيجي للأخوات ولكنها انواع نادرة جداً جداً جداً .. زي التليف الخلقي لعضلات العين وزي الشلل المتطور لعضلات العين وزي بعض انواع الوهن العضلي .. لكن معظم الاخوات اللي عندهم حول مبيكونش حول وراثي ولا حاجة

محمد وفاطمة كانوا كده .. عندهم نوعين حول مختلفين تماماً .. محمد عنده حول انسي خلقي مع فرط نشاط العضلات المائلة .. وفاطمة عندها حول تكيفي جزئي ( يعني حول طول نظر مش بيتعدل بالنضارة ) .. والنوعين دول زي ماكلنا عارفين غير بعض خالص بس الاتنين علاجهم عملية ..

 اسرتهم جت مصر وراجعين العراق تاني بعد 5 ايام .. عملت لهم العملية امبارح .. تاني يوم العملية شفتهم استشارة في العيادة .. صحيح عينيهم لسه حمرا جداً .. بس واضح ان عملياتهم جميلة أوي الحمد لله .. انا حبيت انزل صورتهم بعينيهم الحمرا عشان كل الأمهات اللي بيقلقوا يوم العملية لما يشوفوا عينين ولادهم حمرا بالمنظر ده يعرفوا ان دي حاجة عادية خالص بتحصل لكل الأطفال اللي بيعملوا العملية ويومين تلاتة وعينيهم بتهدى خالص

ألف حمد الله على سلامتكم  يا ولاد وتوصلوا بلدكم بالسلامة