حالة هذا الاسبوع ( 112 ) هدير حسن .. 3 سنين .. من القاهره

" حول طول النظر "

حول طول النظر بيظهرعند الاطفال من عمر سنتين لأربع سنين تقريباً .. ساعات بيظهر قبل كده وساعات بعد كده..

طيب .. ايه علاقة طول النظر بالحول ؟

بعض الاطفال اللي عندهم طول نظر ساعات يحصل لهم حول انسي .. يعني عينهم تحول لجوه .. عشان كده بنسمي الحول ده " حول طول النظر " .. يعني ببساطه شديدة لو عالجنا طول النظر الحول بيتعدل لوحده .. يعني لما الطفل ده يلبس نضارة نلاقي الحول بيتعدل فوراً ..زي هدير كده .. شوفوا ازاي الحول اللي عندها اختفى تماماً لما لبست النضارة

طيب هي هدير هتفضل كده طول عمرها لما تلبس النضارة عينها تتعدل .. ولما تقلع النضارة عينها تحول .. لأ طبعاً .. طول النظرعند معظم الاطفال دول بيتحسن ويقل شويه بشويه .. والنضارة طبعا بيفضل مقاسها يقل ويتحسن برضه شويه بشويه .. لحد ما ييجي وقت نلاقي مفيش طول نظر خلاص ..فيخف الحول طبعاً .. وساعتها نبطل نلبس النضارة

أشهر 3 اسئلة بيسألها امهات الولاد دول

السؤال الأول:

طيب هما الولاد دول مينفعش نعملهم عملية حول بدل النضاره دي ؟

لأ طبعاً مينفعش .. مادام الحول بيتعدل بالنضارة يبقى مفيش عمليات .. بنعمل عملية حول في حاله واحده بس .. لو الطفل لبس النضارة بتاعته والحول ما اتعدلش .. يبقى لازم عملية .. حتى لو الحول اتحسن شوية بس ما اتعدلش تماماً بعد لبس النضارة يبقى برضه لازم عملية حول .. ولازم تعرفوا ان النضاره برضه هتتلبس بعد العمليه عشان طول النظر

السؤال التاني:

طيب مادام النضارة بتعدل الحول يا دكتور جمال .. ممكن نعمل ليزك بدل النضارة ؟

لأ طبعاً مش ممكن نعمل ليزك بدل النضارة .. أولاً الليزك مش بيتعمل للأطفال في السن دي .. الليزك بيتعمل على الأقل بعد سن 18 سنة .. الليزك في الأطفال بيعمل مضاعفات كبيرة جداً على القرنية فأكبر غلط ان الولاد دول يعملوا ليزك بدل النضارة .. زائد هما لسه صغيرين ورقم النضارة بيتغير كل شويه وكل شويه يغيروا النضارة برقم مختلف .. طيب ايه الرقم اللي هيتعمل عليه الليزك دلوقتي ؟ .. يبقى خلاص ياجماعه مينفعش أبداً الطفل اللي عنده حول طول النظر يعمل ليزك بدل النضارة .. مينفعش أبداً .. لما يوصل 18 سنة يبقى يعمل ليزك زي ماهو عايز .. انما دلوقتي لأ

السؤال التالت:

ابني شقي قوي .. مش قادره عليه .. مش عايز يلبس النضاره .. كل شويه يكسرها .. ارجوك يا دكتور جمال شوف لي حل تاني

طيب .. أولاً كل الأطفال كده .. مش ابنك بس يا مدام .. كل الأطفال زي بعض .. كلهم مش بيحبوا النضاره .. الفرق بيكون في الأمهات .. فيه أم شاطره بتعرف تلبس ابنها النضاره .. بالمحايله ..  بالشده .. بالرقه .. كل أم عارفه ابنها بييجي ازاي .. مش أنا اللي عارف .. مادام حضرتك شايفه ان فيه اطفال في عمر ابنك لابسين نضاره .. يبقى اسئلي نفسك اشمعنى انتي مش عارفه تلبسي ابنك النضاره .. ما تسألنيش أنا

الف سلامه يا فندم

د. جمــال صبـــحي