· 

حالة هذا الأسبوع ( 164 ) : بيسان حسن 7 سنين .. ومالك حسن 3 سنين .. من العريش

من شهرين كده كلمتني على الفيس أم من العريش بتحكيلي قصة طويلة عن بنتها وابنها اللي عندهم حول من فترة ومتابعتها مع دكاترة عيون في العريش واللي انا شخصياً اتفاجأت بمستواهم الطبي الراقي جداً .. مكنتش مصدق ان فيه في آخر مدينة مصرية على الحدود الشرقية دكاترة عيون بهذا المستوى المتميز .. المهم .. الدكاترة هناك أجمعوا ان بيسان وأخوها مالك محتاجين عملية حول .. مامتهم كلمتني .. أجي امتى .. العملية امتى .. هأرجع امتى .. عايزة ترتب مواعيد السفر والعودة .. عندها حق .. مشوارها بعيد قوي

المهم .. الاسبوع ده جت لي العيادة ومعاها بنتها الأمورة وابنها العسل ده

لما روحت بلليل دخلت على النت وعرفت قصة القرية دي ( بيسان اسم مدينة فلسطينية محتلة .. وهي من أقدم مدن فلسطين التاريخية ..  تقع اليوم في لواء الشمال الاسرائيلي على بعد 83 كم شرق القدس الشريف .. ويبلغ عدد سكانها 16,200 نسمة معظمهم ألآن من اليهود بعد تهجير السكان العرب الأصليين منها بعد عام 48 .. يقال ان اسمها مشتق من كلمة شان بمعنى الإله .. وقد ذكر اسمها كثيراً في الرسائل الفرعونية ضمن قائمة انتصارات الملك المصري تحتمس الثالث في القرن الرابع عشر ق.م. )

نرجع بقى لموضوع بيسان بتاعتنا وأخوها الصغير مالك

حكت لي قصة ولادها .. صحيح الاتنين عندهم حول انسي .. لكن من نوعين مختلفين تماماً .. بيسان عندها طول نظر من النوع اللي لما بتلبس النضارة الحول مش بيتعدل والنوع ده من حول طول النظر بيحتاج عملية مع لبس النضارة برضه .. لكن مالك عنده الحول الأنسي الخلقي اللي بيظهر في أول 6 شهور من عمر الطفل و علاج النوع ده من الحول عملية برضه

تاني يوم الصبح عملت لهم العملية .. كان يوم الأحد .. يوم الأربعاء .. بعد العملية ب 3 ايام .. كانوا عندي في العيادة عشان عايزين يسافروا العريش يوم السبت

عينيهم لسه حمرا طبعاً .. لكن نتيجة العملية واضحة جداً .. عملياتهم ممتازة الحمد لله .. قلت لمامتهم كمان اسبوعين كده لما الاحمرار يروح تعمل النضارة الجديدة لبيسان عند الدكاترة الممتازين اللي كانوا بيتابعوها في العريش

ألف حمد الله على سلامتهم يافندم .. ربنا يسلم طريقكم وتوصلوا بلدكم بالسلامة

د. جمــال صبـــحي