|
·
حالة هذا الاسبوع ( 170 ) مروان .. 3 سنين .. من القاهرة
" حول طول النظر "
أو الحول التكيفي
كتير من الأطفال اللي عندهم طول نظر بيحصل لهم حول
انسي .. يعني عينيهم تنحرف للداخل وده بيحصل عادة من عمر سنة
لحد عمر أربع سنين تقريباً ..
ساعات بيحصل قبل كده وساعات بيحصل بعد كده ..
الحول ده اسمه ياجماعه حول طول النظر .. يعني طول
النظر هو اللي عمل الحول .. وعشان نعالج الحول لازم طبعاً
نعالج طول النظر .. وعلاج طول النظر في السن دي زي ما كلنا
عارفين هو النضارة
ساعات لما الطفل يلبس النضارة الحول يتعدل ولما يقلع
النضارة الحول يظهر .. يبقى خلاص الطفل ده علاجه نضارة مش
عملية حول
بس ساعات برضه لما الطفل يلبس النضارة نلاقي الحول لسه
موجود .. زي مروان كده .. عنده طول نظر .. عملت له نضارة وقلت
نشوف بعد النضارة الحول هيروح ولا هيفضل موجود .. مروان جاني
بعد لبس النضارة بشهر .. لقيت وهو لابس النضارة الحول قل شوية
بس برضه موجود .. ومادام الحول لسه موجود حتى لما نلبس النضارة
.. يبقى خلاص مفيش حل تاني للحول إلا عملية حول بس برضه بعد
العملية هيلبس النضارة عشان طول النظر .. زيه زي أي حد عنده
طول نظر ومحتاج نضارة عشان يشوف كويس وعشان كمان لو مش هيلبس
نضارة بعد العملية طول النظر هيعمله حول تاني .. دي صورة مروان
بالنضارة بعد العملية
الف
حمد الله على سلامتك يا حبيبي
عمليتك حلوة أوي الحمد لله
ونضارتك كمان حلوة أوي
وشكلك بالنضارة زي القمر
د. جمــال صبـــحي
|
.jpg)
