اتصل بي اسئلة شائعة استشارات عن بعد حالة هذا الأسبوع انواع الحول معلومات تهمك الصفحة الرئيسية


الحول الانسي التبادلي 11


    
 

حالة هذا الأسبوع ( 206 ) : عاصم ياسين .. 8 سنين .. من القاهرة 

" الحول الانسي التبادلي "

طبعاً احنا اتكلمنا كتير قبل كده عن الحول التبادلي  وعرفنا ان تبادلي يعني الحول كل شويه بيبدل .. زي عاصم كده .. شويه تبقى عينه اليمين هي اللي حوله وعينه الشمال مظبوطه .. يقعد كده شويه وبعدين يقلب عالناحيه التانيه .. عينه الشمال تحول وعينه اليمين تبقى مظبوطه .. انما عمره مايظبط عينيه الاتنين ابداً .. دايماً أحول يا باليمين .. يا بالشمال .. بس العيانين دول بتوع الحول التبادلي عندهم حاجة جميلة قوي .. مش ممكن يحصل لهم كسل وظيفي ولا نظرهم يضعف أبداً مهما طالت مدة الحول .. مش زي العيانين التانيين اللي طول عمرهم بيبصوا بعين واحدة بس والعين التانية حوله على طول .. العين اللي حوله على طول زي ما كلنا عارفين نظرها بيضعف جداً .. بتكسل يعني .. انما الحول اللي بيبدل بنلاقي النظر في العينين الاتنين ممتاز .. يعني عاصم برغم ان الحول ده عنده من ساعة ما اتولد .. لكن عشان تبادلي نلاقي عينه اليمين 6/6 والشمال 6/6 .. وهيفضل نظره كويس على طول ومش هيضعف ابداً

كتير من الامهات لما بيعرفوا مني المعلومة دي وان مفيش أي خوف على نظر ابنهم أو بنتهم من الحول التبادلي .. مش بيعملوا العملية على طول .. وساعات بيسيبوا الطفل لما يكبر شوية وبعدين يعملوا له العملية .. زي عاصم كده ..  انا عايز أقول هنا حاجة مهمة جداً .. النظر الى الأشياء بالعينين مع بعض في نفس اللحظة من أهم المهارات البصرية عند البشر .. الناس الكبار اللي عندهم حول تبادلي معندهمش المهارة دي .. وعشان كده انا دايماً بأنصح بعمل عملية الحول التبادلي في وقت مبكر عند الأطفال عشان نحافظ على المهارة دي

حاجة تانية مهمة .. بما اننا كده كده هنعمل العملية .. لأن مش معقول أم تسيب ابنها أو بنتها حوله كده .. وأكيد هتعمل العملية .. يبقى نعمل العملية بدري أحسن عشان نبقى حققنا هدفين .. هدف الشكل الحلو وهدف المحافظة على الوظيفة   

عاصم جالي النهارده تاني بعد شهر من العمليه .. الحمد لله عمليته زي الفل .. شكله بقى طبيعي خالص

حمد الله على سلامتك يا عاصم والف مبروك

د. جمــال صبـــحي



الموقع المصري للحول وامراض الجهاز الحركي للعين

The Egyptian Site of Strabismus & Oculomotor Disorders