حالة هذا الأسبوع ( 236 )
اسمي : علي عبد القوي .. عندي 25 سنة .. من قنا

متخرج من كلية التربية النوعيه جامعه جنوب الوادي والسنة دي هتعين معيد في الكلية

الحول عندي من وانا صغير .. يعني قضيت طفولتي ومدرستي وشبابي والجامعة وانا عندي حول

الحول مش بيأثر بس علي شكل العين ده بيأثر علي النفسية بتاعتك

كنت دايما معنديش ثقة في نفسي .. معرفش اكلم حد .. معرفش ابص في عين حد وهو بيكلمني .. طيب دلوقتي انا جالي تعيين معيد في الجامعة .. هاشرح الدروس للطلبة ازاي .. هابص في عينيهم ازاي
المهم .. دكتور جمال عمل لي العملية من اسبوعين تقريباً .. عملتها ببنج موضعي .. اخدت وقت حوالي ساعة .. بعد العملية على طول مشيت من المستشفى علي رجلي عادي وروحت البيت .. بس العملية شدت بالليل علشان تأثير البنج ابتدي يخف لكن من تاني يوم الألم كان بسيط والعين يوم عن يوم بتفتح معاك والاحمرار راح شوية بشوية

أحكيلكم بقى عن الفرق اللي حصل في حياتي  .. انا بقيت مهووس سيلفي .. اتصورت ييجي 300 صورة سيلفي من يوم العملية لحد النهارده .. وكل شويه ابص علي عيني في المرايه وانا فرحان ان عيني بقيت طبيعية

انا راسلت الدكتور جمال وطلبت منه ينزل صورتي على صفحته .. انا عندي الشجاعة الكاملة ان الناس تشوف صوري قبل العملية وبعد العملية .. انا مش شايف في الموضوع اي حرج .. صورتي لما كان عندي حول مش غريب .. كل اصحابي واخواتي وقرايبي وجيراني شافتني كده قبل العملية .. صورتي قبل العملية مش سر يعني .. كل الناس شافوني كده .. انا حابب يشوفوني دلوقتي بقى شكلي عامل ازاي

الحمد لله رب العالمين .. عايز كل الناس تدعيلي