حالة هذا الأسبوع ( 259 )
" الحول الوحشي التبادلي "

تبادلي يعني الحول كل شويه بيبدل .. زي حالة النهارده  .. شويه تبقى عينها اليمين هي اللي حوله وعينها الشمال مظبوطه .. تقعد كده شويه وبعدين تقلب عالناحيه التانيه .. عينها الشمال تحول وعينها اليمين تبقى مظبوطه .. انما عمرها ماتظبط عينيها الاتنين ابداً .. دايماً تحول يا باليمين .. يا بالشمال .. بس العيانين دول عندهم حاجة جميلة قوي .. مش ممكن يحصل لهم كسل وظيفي ولا نظرهم يضعف أبداً مهما طالت مدة الحول .. مش زي العيانين التانيين اللي طول عمرهم بيبصوا بعين واحدة بس والعين التانية حوله على طول .. العين اللي حوله على طول زي ما كلنا عارفين نظرها بيضعف جداً .. انما الحول اللي بيبدل بنلاقي النظر في العينين الاتنين ممتاز .. يعني حالة النهاردة برغم ان الحول ده عندها من زمان.. بس عشان تبادلي نلاقي عينها اليمين 6/6 والشمال 6/6 .. وهيفضل نظرها كويس على طول ومش هيضعف ابداً

كتير من العيانين لما بيعرفوا مني المعلومة دي وان مفيش أي خوف على نظرهم من الحول التبادلي .. مش بيعملوا العملية على طول .. وساعات بيستنوا كتير وبعدين يعملوا العملية .. بس في الآخر بيعملوها لأن الحول التبادلي عادة بتكون درجته كبيرة أوي وبيأثر على الشكل جدا   

لاحظوا الفرق الكبير في شكل البنت قبل العملية وبعد العملية .. فرق كبير أوي .. الحمد لله يابنتي على نجاح عمليتك وألف مبروك

د. جمال الدين احمد صبحي

رئيس قسم الحول بالمعهد التذكاري للأبحاث الرمدية

*************************