حالة هذا الاسبوع ( 60 ) احمد حامد 20 سنة من الزقازيق

الحول المركب الأنسي والعلوي

اصعب عمليات بأعملها يا جماعة هي عمليات الحول المزدوج .. لما يكون الحول افقي ورأسي مع بعض .. هأقول لكم بعد شوية العمليات دي بتبقى صعبة ليه .. 

حالة النهاردة .. احمد شاب شرقاوي في كلية تجارة الزقازيق .. فاضل له سنة ويتخرج .. عنده حول انسي وعلوي .. يعني عينه الحولة داخلة لجوة وطالعة لفوق .. النوع ده من الحول بيبقى دايماً معاه حاجتين .. أول حاجة العين الحولة بتكون ضعيفة جداً وفيها كسل شديد .. تاني حاجة بصراحة يا جماعة .. الحول المزدوج بيخلي شكل العيان وحش قوي .. احمد لما جاني .. قال لي بالحرف الواحد .. انا رحت لدكاترة كتير يا دكتور جمال وعارف ان عيني اليمين الحول ضعغها خلاص لأني اهملت الحول وما عالجتوش من زمان .. ده مش مهم عندي .. انا اهم حاجة عايز يكون شكلي طبيعي .. الموضوع ده معقدني عالآخر .. مش بأقدر أبص في وش زمايلي .. دايماً باصص في الأرض .. مش عايز حد يشوف عينيا

كتير من الدكاترة بيعملوا العملية دي على مرتين مرة يظبطوا الحول الانسي .. والعملية التانية يظبطوا فيها الحول العلوي .. في الحقيقة أصعب حاجة في العمليات دي ياجماعة هي القياسات اللي باخدها قبل العملية .. ازاي نعرف نحدد بدقة درجة الحول الانسي ودرجة الحول العلوي وزاوية ميل العين عشان نقدر نعدل الحول من عملية واحدة ..

ما علينا .. عملت العملية لأحمد من اسبوع كده .. النهاردة الاستشارة بتاعته .. اقول لكم سر .. العمليات المكلكعة دي بأبقى قاعد في العيادة مستني العيان بفارغ الصبر .. نفسي اشوف النتيجة .. أخيراً .. دخل احمد .. بمجرد ما بصيت في وشه قلت في سري .. الحمد لله رب العالمين .. يستاهل الحمد .. عملية هايلة والله

الف مبروك يا احمد

د. جمــال صبحي