|
حالة هذا الأسبوع : خالد سيد ... 11 سنة
..
من الجيزة
الحول المركب
" الأفقي والرأسي "
مامة خالد جت لي العيادة من اسبوع .. زعلانة جداً
من شكل عين ابنها ..
" عين خالد الشمال يا دكتور جمال
طالعة لفوق .. وكمان طالعة لبرة " .. نفسها يبقى شكله عادي
زي بقية الولاد .. خالد نفسه كبر .. ابتدى ياخد باله ان
اصحابه بيبصوا عليه بصة غريبة .. انا حسيت انه مديها
اكتئاب حبتين وانطوائية شويتين.. شخصياً انا لاحظت ده ..
باين قوي انه مش زي الولاد اللي في سنه
الحول المركب ده من أصعب انواع الحول اللي بيجيني
وبيحتاج حسابات تانية خالص عشان نقدر نصلحه .. العين زي
مانتم شايفين محدوفة لبرة ولفوق .. يعني الشغل هنا حيكون
على العضلات الافقية وكمان على العضلات الرأسية .. طيب
الصعوبة هنا فين ؟؟
الصعوبة هنا ان الشغل على العضلات الرأسية بيكون
ليه تأثير على الوضع الافقي للعين وبيكون ليه تأثير برضه
على الجفن العلوي وساعات بيعمل ارتخاء في الجفن .. والشغل
على العضلات الافقية ممكن يأثر برضه على الوضع الرأسي
للعين يعني ممكن يطلعها لفوق او ينزلها لتحت.. والشغل كله
يا جماعة بيكون مليمترات في العضلة دي .. ومليمترات في
العضلة دي .. وجزء من المليمتر في العضلة دي .. يعني لو ما
عرفناش نحسبها ونقيسها صح قبل العملية الدنيا حتبوظ مننا
خالص .. بالعربي كده الموضوع عايز واحد معلم .. ( الجملة
الاخيرة دي مخصوص للجماعة اللي بيكتبوا كومنتات بيقولوا
عليا مغرور
) ..
عملت العملية لخالد من اسبوع كده .. ميعاده
النهاردة في العيادة .. مامة خالد ضحكتها سامعها من وانا
في الاسانسير .. عندك حق بجد يا ماما .. بجد ياخلودة شكلك
اتغير خالص .. عمليتك هايلة والله .. حاجة تفرح .. ولسه
كمان لما شوية الحمار دول يروحوا ..
الحمد لله ياخالد .. وربنا يوفقك يا ابني
د. جمــال صبـــحي
|
.jpg)
