الحول المركب " الأفقي والرأسي " 3

حالة هذا الأسبوع ( 128 ) : عبد الرحمن محسن .. 16 سنة .. من إمبابه .. الجيزه

" الحول المركب الوحشي العلوي "

عبد الرحمن ولد مؤدب جداً وضحوك جداً وخفة دم ما تتوصفش .. تقريباً مش بيبطل ضحك .. من اسبوعين كده جالي العياده مع والدته بيشتكي من الحول ده .. عايز يعمل عمليه ويبقى شكله طبيعي ..

ممكن يا دكتور جمال ؟

واجابتي المشهوره :

طبعاً ممكن ان شاء الله

أصعب انواع الحول هو الحول المركب .. مركب يعني حول أفقي ورأسي مع بعض .. زي عبد الرحمن كده .. عنده حول مركب .. عينه حادفه لبره ولفوق في نفس الوقت .. عشان كده تحس ان عنده عين أوسع شويه من العين التانيه .. كتير من العيانين دول بيحتاجوا عمليتين عشان الحول ده يتعدل .. وبعضهم الحول يتعدل أفقياً ورأسياً من عمليه واحده .. طبعاً في الحالات دي بنشتغل على العضلات الأفقيه والرأسيه .. ولو كان الحول درجاته كبيره بنشتغل في العينين مش في عين واحده.. طبعاً الناس كلها بتستغرب من المعلومه دي .. إزاي يعني يبقى الحول في عين واحده والعمليه تتعمل في العينين !! .. طيب نقول كمان .. حتى يا جماعه لو كان الحول في عين واحده ساعات مينفعش يتعدل الحول من ناحيه واحده .. لازم من الناحيتين .. لازم نشتغل في العينين .. دي حاجه عاديه في عمليات الحول ومتقلقش أبداً 

المهم .. عملت العمليه لعبد الرحمن من اسبوع .. العمليه كانت في العينين .. عملت الحول الأفقي والرأسي مع بعض .. العيانين دول بأبقى قلقان عليهم جداً ونفسي اشوفهم بعد العمليه عاملين ايه ..

أخيراً عبد الرحمن جالي النهارده .. دخل عندي العياده بوشه البشوش وضحكته الجميله .. وعينين ايه .. بسم الله ما شاء الله .. عمليه حلوه فعلاً .. العين اتعدلت تماماً في كل الاتجاهات .. الحمد لله رب العالمين .. وشكله اتغير فعلاً .. ولسه كمان لما الاحمرار ده يروح بعد اسبوع من دلوقتي هيبقى شكله أحلى وأحلى 

حمد الله على سلامتك يا ابني .. والف الف مبروك...

د. جمــال صبـــحي