|
حالة هذا الاسبوع ( 139 ) ع.ع.م ..
17 سنة من الحوامدية
الحول الأنسي العلوي
حالة النهارده .. ع.ع.م شاب زي الفل من الحوامدية
- الجيزة .. عينه الشمال فيها حول مركب .. افقي ورأسي في
نفس الوقت .. عينه داخله لجوه وطالعه لفوق .. يعني عنده
حول انسي وعلوي .. في النوع ده من الحول العين الحوله
بتكون ضعيفه جداً وفيها كسل شديد .. تاني حاجه .. الحول
المركب ده بيأثر على شكل العيان جداً .. ع.ع.م لما جاني ..
قال لي بالحرف الواحد .. انا قريت كل حاجه على صفحتك يا
دكتور جمال وعارف ان عيني الشمال الحول ضعغها خلاص لأني
اهملته وما عالجتوش من زمان .. ده مش مهم عندي .. انا اهم
حاجة عندي دلوقتي عايز يكون شكلي طبيعي .. الموضوع ده
معقدني عالآخر .. مش بأقدر أبص في وش الناس .. دايماً باصص
في الأرض .. مش عايز حد يشوف عينيا
طيب .. من اصعب عمليات الحول اللي باعملها هي
عمليات الحول المركب .. لما يكون الحول افقي ورأسي مع بعض
.. كتير من الدكاتره بيعملوا العمليه دي على مرتين .. وده
مش غلط .. مره يظبطوا الحول الانسي .. والعملية التانيه
يظبطوا فيها الحول العلوي .. في الحقيقة أصعب حاجة في
العمليات دي ياجماعة هي القياسات اللي بناخدها قبل العملية
.. ازاي نعرف نحدد بدقة درجة الحول الانسي ودرجة الحول
العلوي وزاوية ميل العين عشان نقدر نعدل الحول من عملية
واحده .. وبرضه بأفهم العيان انه ممكن يحتاج عمليه تانيه
.. الحاجه التانيه والأهم اننا ساعات بنحتاج نعمل العمليه
في العينين مش في العين الحوله بس .. زي حالة النهارده ..
هنا دايماً العيان بيعترض .. طبعاً خايف على عينه اللي
بيشوف بيها .. دورنا اننا نقعد معاه ونطمنه ان عمليات
الحول مش بتأثر على النظر خالص .. العمليه بتكون في عضلات
العين مش في العين نفسها .. بس ضروري في الحالات دي بنشتغل
على عضلات العين السليمه عشان نظبط العينين مع بعض ..
المهم .. عملت العملية ل ع.ع.م من اسبوع كده ..
النهارده الاستشارة بتاعته .. العمليات المكلكعة دي بأبقى
قاعد في العيادة مستني العيان بفارغ الصبر .. نفسي اشوف
النتيجة .. أخيراً .. دخل ع.ع.م .. بمجرد ما بصيت في وشه
قلت الحمد لله رب العالمين .. يستاهل الحمد .. عملية هايلة
والله
الف مبروك يا ابني وحمد الله على سلامتك
د. جمــال صبحي
|
.jpg)
