حالة هذا الاسبوع ( 178 ) آمال عبد الجواد ..  31 سنة من أسيوط

الحول الوحشي العلوي .. كلاكيت خامس مرة

آمال هي أصعب حالة يا جماعة عملتها لحد دلوقتي في 2018

البنت دي عملت 4 عمليات قبل كده والحول اللي عندها ماتعدلش .. ودي خامس عملية

حالة النهارده .. آمال موظفة آخر جدعنة من أسيوط .. عينها اليمين فيها حول مركب .. افقي ورأسي في نفس الوقت .. عينها طالعه لفوق ولبره .. يعني عندها حول وحشي وعلوي .. بس المهم انها عملت قبل كده 4 عمليات عند 4 دكاترة وفي كل مرة تلاقي الحول زي ماهو مفيش أي تحسن  

أصلاً في النوع ده من الحول المركب  .. اللي هو أفقي ورأسي مع بعض العين الحوله بتكون ضعيفه جداً وفيها كسل شديد .. تاني حاجه .. الحول المركب ده بيأثر على شكل العيان جداً .. آمال لما جاتني .. قالت لي بالحرف الواحد .. انا قريت كل حاجه على صفحتك يا دكتور جمال وعارفه ان عيني اليمين الحول ضعفها خلاص .. ده مش مهم عندي .. انا اهم حاجة عندي دلوقتي عايزه يكون شكلي طبيعي .. الموضوع ده معقدني عالآخر .. مش بأقدر أبص في وش الناس .. والمشكلة اني موظفة وطول اليوم باتعامل مع الجمهور .. دايماً باصه في الأرض .. مش عايزه حد يشوف عينيا بالمنظر ده .. أنا عملت 4 عمليات قبل كده والحول هو هو .. مفيش فايدة .. أنا قريت على صفحتك ان الواحد لا ييأس .. عمل عملية وفشلت .. يعمل عملية تانية .. عملها وفشلت برضه لا ييأس يعمل عملية تالتة .. عملها وفشلت برضه لاييأس يعمل عملية رابعة .. المهم ما يرضاش يعيش حياته بالحول ده .. لازم الحول يتعدل .. لازم .. أنا دلوقتي يا دكتور جمال عملت 4 عمليات قبل كده .. ينفع اعمل عملية خامسة ولا خلاص فرصتي انتهت ؟ .. لأ طبعاً لسه عندك فرصة .. صحيح الموضوع هيكون صعب جداً والعضلات هتكون دي المرة الخامسة اللي بنقصرها ونطولها ونحركها .. بس لازم نحاول .. ربنا يسهل .. انتي بنت شجاعة يا آمال .. ده فيه بنات غيرك لو عملت عملية مرة والحول ماتعدلش الدنيا تسود في وشها ويجيلها يأس واحباط بقية عمرها وترفض أي محاولة أخرى لإصلاح الحول وتعيش حوله طول عمرها .. أنا متعاطف معاكي جداً ومعجب جداً بشجاعتك واصرارك وإن شاء الله أقدر أعدلها بتوفيق ربنا

طيب .. من اصعب عمليات الحول اللي باعملها هي عمليات الحول المركب .. لما يكون الحول افقي ورأسي مع بعض .. ما بالك لما بتكون دي العملية الخامسة .. فعلاً دي أصعب عملية عملتها السنة دي

المهم .. عملت العملية ل آمال من اسبوع كده .. العملية أخدت وقت أطول من الطبيعي زي ماتوقعت .. كانت عملية صعبة فعلاً .. كانت موقعة حربية مش عملية .. النهارده الاستشارة بتاعتها .. العمليات المتعبة دي بأبقى قاعد في العيادة مستني العيان بفارغ الصبر .. نفسي اشوف النتيجة .. ياترى عينها اتعدلت ولا لأ .. يارب تكون النتيجة كويسة .. أخيراً .. دخلت آمال .. بمجرد ما بصيت في وشها قلت الحمد لله رب العالمين .. يستاهل الحمد .. عمليتها هايلة والله .. أخيراً يا بنتي .. معلهش العين هتكون حمرا أكتر من الطبيعي .. عادي ماتقلقيش .. اسبوعين تلاتة والحمار هيروح .. المهم الحول اتعدل أخيراً

الف مبروك يا بنتي وحمد الله على سلامتك

د. جمــال صبحي