حالة هذا الأسبوع ( 97 ) : منى عبد الحميد حلاوة ..  8 سنوات .. من سمنود .. الغربية

" الحول الوحشي المعكوس "

من شهر كده وانا في العيادة .. جرس التليفون

·     انا الدكتور جمال صبحي يافندم .. تحت امرك

·     ازيك يا دكتور جمال .. انا مامة منى حلاوة من سمنود .. حضرتك عملت العملية لبنتي لما كان عندها سنة ونص .. كان عندها حول انسي .. حضرتك مش فاكرها ؟ .. منى عندها دلوقتي 8 سنين .....

( الكمبيوتر كان مفتوح قدامي .. فتحت ملف منى عبد الحميد حلاوة .. فعلاً كان عندها حول انسي خلقي .. انا عملتلها عملية سنة 2010 وصورتها قدامي أهي .. بنت أمورة أوي .. منى بعد العملية كانت هايلة وعينيها اتعدلت خالص )

·     تمام .. مالها منى يافندم

·     منى رجع لها الحول تاني من 6 شهور كده يا دكتور جمال

·     حول انسي زي بتاع زمان ياماما .. ولا عينيها حادفة لبره

·     لأ .. هي عندها دلوقتي حول وحشي مش حول انسي .. عينيها حادفة لبره

( الحول ده يا جماعة اسمه الحول الوحشي المعكوس .. يعني البنت أصلاً كان عندها حول انسي وعملت عملية وعينيها اتعدلت .. وبعد كام سنة عينها ابتدت تحدف لبره .. يعني حصلها حول وحشي بعد ما كان حول انسي .. عشان كده بنسميه الحول المعكوس .. يعني الحول عكس على الناحية التانية )

·     الحول ده يا ماما علاجه عملية .. اسمه الحول المعكوس .. ملوش علاج تاني .. لازم عملية

·     وده سببه ايه يادكتور ؟

·     والله مانعرف سببه يا حاجة .. نسبة قليلة من الأطفال اللي بيعملوا عملية الحول الانسي وهما صغيرين .. عينيهم بتتعدل ونلاقيهم بعد خمس ست سنين كده بيحصل لهم الحول المعكوس ده .. وبيحتاجوا يعملوا عملية تانية عشان عينيهم تتعدل

·     طيب وبعد العملية التانية دي .. مش ممكن يحصل لهم حول تاني ؟

·     لأ طبعاً .. عينيهم بتتعدل وماتحولش تاني خالص بعد كده

·     طيب مش غلط على عينيها يا دكتور جمال انها تعمل عملية تانية ؟

·     الغلط ياماما ان احنا نسيب طفلة عندها 8 سنين وعينيها حوله .. هو ده الغلط .. عملية الحول ملهاش أي اضرار وحضرتك عارفة .. الموضوع كله نص ساعة والبنت ترجع زي الفل ان شاء الله

المهم بعد المكالمة دي بيومين منى جت لي العيادة مع مامتها .. البنت كبرت ماشاء الله .. فعلاً عندها حول وحشي واضح جداً ..

تاني يوم عملت العملية لمنى .. عينيها كانت حمرا أوي بعد العملية عشان دي تاني مرة تعملها .. استنيت شوية لما عينيها ارتاحت وصورتها .. وطلبت من مامتها اني انزل صورها على الفيس في حالة هذا الاسبوع ووافقت بمنتهى الترحاب

الف شكر يافندم

وحمد الله على سلامتك ياحبيبتي

د. جمــال صبـــحي