|
حالة هذا الأسبوع ( 46 ) : محمد ... 5 سنوات .. من
بورسعيد
اعوجاج الرقبة والحول الدوراني
انا شفت في حياتي كتير من الأطفال دول اللي عندهم
حول دوراني ورقبتهم معووجة وامهاتهم لفوا بيهم على دكاترة
العظام والعلاج الطبيعي وقعدوا يعملوا ليهم تمارين للرقبة
شهور وسنين عشان رقبتهم تتعدل من غير فايدة ...لدرجة ان
فيه حالات شفتها عملوا فعلاً عمليات في عضلات الرقبة عشان
رقبتهم تتعدل ..
امهات الولاد دول بيستغربوا جداً
لما
دكتور العظام يقوللهم : اكشفوا عند دكتور حول !!! .. ايه
علاقة الحول بالرقبة المعووجة !!!
يا جماعة أي أم تلاقي ابنها رقبته معووجة - خصوصاً
لما يعرف يقعد لوحده في الشهر السادس – لازم تشك في الحول
الدوراني ...
الحول الدوراني هو نوع حول غريب شوية .. لأن الطفل
مش بيبان عليه انه احول خالص .. بس دايماً نلاقيه عاوج
رقبته ..
انا هاقول لكم الولد بيعوج رقبته ليه .. في الحول
الدوراني يا جماعة العين بتلف حوالين نفسها من غير ما
تتحرك من مكانها لا يمين ولا شمال ولا فوق ولا تحت ...
يعني العين بتبقى في مكانها مش حولة ولا حاجة .. بس لفه
شوية .. فالطفل ياعيني يشوف صورتين صورة مايلة بتاعة العين
اللي فيها حول دوراني وصورة معدولة بتاعة العين السليمة ..
وعشان يشوف صورة واحدة يعمل ايه ؟ .. يعوج رقبته ويميل
براسه ناحية كتفه .. الولاد دول بيصعبوا عليا قوي ..
بيمشوا في الشارع عاوجين رقبتهم .. قاعدين في الفصل عاوجين
رقبتهم .. بيلعبوا مع صحابهم عاوجين رقبتهم .. بيبصوا في
الموبايل عاوجين رقبتهم ..
زي محمد كده قبل العملية .. على طول عاوج رقبته
كده عشان يظبط الصورتين على بعض
الولاد دول بمجرد ما بيعملوا العملية نفاجئ ان رقبتهم اللي
كانت معووجة من ساعة ما اتولدوا بتتعدل فوراً .. ويبص
طبيعي زي بقية الاطفال
محمد بعد ماعمل العملية في عينه اللي فيها حول دوراني ..
الحمد لله رقبته اتعدلت في نفس يوم العملية
.. حمد الله على
السلامة ... والف مبروك
د. جمــال صبـــحي
|
.jpg)
