حالة هذا الأسبوع ( 53 ): هاني أسعد 7 سنوات .. من قنا

يا جماعة نقول تاني وتالت .. أي أم تلاقي ابنها رقبته معووجة - خصوصاً لما يعرف يقعد لوحده في الشهر السادس – لازم تشك ان سبب عوجة رقبته ان تكون عينه فيها مشكلة .. كتير من الناس مايعرفوش الموضوع ده ..

انا شفت كتير من الأطفال دول اللي رقبتهم معووجة أمهاتهم راحوا بيهم لدكاترة العظام والعلاج الطبيعي وقعدوا يعملوا ليهم تمارين للرقبة شهور وسنين عشان رقبتهم تتعدل من غير فايدة ...لدرجة ان انا شفت مرة طفلين عملوا عمليات في عضلات الرقبة عشان رقبتهم تتعدل.. وبرضه ما اتعدلتش .. أمهات الولاد دول يا جماعة بيستغربوا قوي لما دكتور العظام يقول لهم : اكشفوا عند دكتور حول !!! .. ايه علاقة الحول بالرقبة المعووجة !!!

هاني واحد من الاطفال دول .. هاني عنده 7 سنين .. طفل صعيدي عسول جداً .. مامته وباباه شافوا على صفحتي إن العيال اللي رقبتهم معووجة لازم يكشفوا عند دكتور حول .. جابوا  لي هاني من الصعيد عشان اشوفه ..  انا سعيد جداً يا جماعة ان المعلومات اللي باكتبها على صفحتي بيستفيد منها ناس كتير .. الدعوة بتاعتي انتشرت .. وصلت الصعيد الجواني .. وصلت لحد قنا ..

 " هاني يا دكتور جمال من ساعة ما اتولد وهو رقبته معووجة كده  .. احنا كشفنا كتيرعند دكاترة العظام .. عملنا اشعات على رقبته ..  وعملنا له تمارين علاج طبيعي كتير .. مفيش فايدة .. رقبته مش عايزة تتعدل أبداً .. لحد أما شفنا على صفحتك في الفيس ان ممكن تكون عينيه هي سبب عوجة رقبته "

طيب اقول لكم ايه علاقة الرقبة المعووجة بالعين

كتير من انواع الحول بتخلي الاطفال يعوجوا رقبتهم .. زي هاني كده .. عنده نوع من الحول اسمه " الحول الدوراني "

 الحول الدوراني يا جماعة هو حول غريب جداً بيتولد الطفل بيه .. بتلف فيه العين حوالين نفسها من غير ما تتحرك من مكانها .. يعني الطفل مايبانش ان عنده أي حول .. لكن الطفل يا عيني يشوف صورتين .. صورة عادية معدولة بتاعة العين السليمة وصورة تانية معووجة بتاعة العين الملفوفة .. وعشان يشوف صورة واحدة يعوج رقبته ويميل براسه .. زي هاني كده .. من ساعة ما اتولد وهو كده .. عاوج رقبته على طول .. تصوروا يا جماعة .. هاني بيمشي وهو عاوج رقبته .. بيذاكر وهو عاوج رقبته .. بياكل وهو عاوج رقبته .. بيتفرج على التليفزيون وهو عاوج رقبته ..

المهم .. الحمد لله .. عملت العملية لهاني .. عدلت عينه الملفوفة اللي عاملة المشكلة ..  بعد العملية بيومين هاني جاني العيادة  .. من أول ما فتح باب العيادة عرفت ان عمليته هايلة .. داخل من باب العيادة فارد طوله زي القمر ..

" أخيراً رقبتك اتعدلت يا استاذ " ..

حمد الله على السلامة يا ابني والف مبروك

د. جمـال صبحي