حالة هذا الاسبوع ( 66 ) عبد الرحمن ايهاب 10 سنوات .. من بولاق ابو العلا .. القاهرة .. يعني أجدع ناس

" الحول الدوراني واعوجاج الرقبة "

صباح الفل يا أم عبد الرحمن .. كل شوية يافندم افتح الفيس مستنيكي تبعتي الصورة اللي انتي صورتيها بموبايلك عندي في العيادة .. اخيراً النهاردة الصورة وصلت .. صباح الفرحة والبسمة والسعادة ورسايل الفيس الجميلة الرقيقة .. شكراً والله يافندم .. الحمد لله رب العالمين

 الحالات ياجماعة اللي زي حالة عبد الرحمن دي مش بأنساها أبداً .. بتسيب عندي علامة كده بتفضل على طول 

انا شفت في حياتي كتير جداً من الولاد دول اللي رقبتهم معووجة كده .. بيصعبوا عليا قوي ..  امهاتهم ياعيني بيقعدوا يلفوا بيهم على دكاترة العظام ويعملوا ليهم تمارين للرقبة شهور وسنين عشان رقبتهم تتعدل من غير فايدة

يا جماعة أي أم تلاقي ابنها رقبته معووجة كده على طول لازم تشك فوراً في الحول الدوراني ...

الحول الدوراني هو نوع حول غريب شوية .. لأن الطفل مش بيبان عليه انه احول خالص .. بس دايماً نلاقيه عاوج رقبته ..

في الحول الدوراني العين بتلف حوالين نفسها من غير ما تتحرك من مكانها لا يمين ولا شمال ولا فوق ولا تحت ... يعني العين بتبقى في مكانها مش حولة ولا حاجة .. بس لافه شوية .. فالطفل ياعيني يشوف صورتين صورة مايلة بتاعة العين اللي فيها حول دوراني وصورة معدولة بتاعة العين السليمة .. وعشان يشوف صورة واحدة  يعوج رقبته كده .. الولاد دول بيمشوا في الشارع عاوجين رقبتهم .. قاعدين في الفصل عاوجين رقبتهم .. بيلعبوا مع صحابهم عاوجين رقبتهم .. بيبصوا في الموبايل عاوجين رقبتهم .. 

الولاد دول ياجماعة بمجرد ما بيعملوا العملية ونعدل عينهم اللي لافة دي بنلاقي رقبتهم اللي كانت معووجة من ساعة ما اتولدوا بتتعدل فوراً

صباح الفل يافندم .. الحمد لله .. وربنا يخليه ليكي ويبارك فيه

د. جمــال صبـــحي