عوجة الرقبة وعلاقتها بالعين

من سنين طويله وانا بشوف كتير جدا من البيبيهات دول اللي رقبتهم معووجه وأمهاتهم راحوا بيهم لدكاتره العظم والعلاج الطبيعي وقعدوا يعملوا ليهم تمارين للرقبه شهور وسنين عشان رقبتهم تتعدل من غير فايده ... لدرجة ان فيه حالتين متسجلين عندي لطفلين عملوا عمليات في عضلات الرقبة عشان رقبتهم تتعدل.

أمهات البيبيهات دول بيستغربوا أوي لما دكتور العظام يقوللهم : اكشفوا عند دكتور حول !!! ..

هو ايه علاقة الحول بالرقبة المعووجه !!!

يا جماعه أي أم تلاقي البيبي بتاعها رقبته معووجه - زي " علي " اللي في الصوره ده -  خصوصاً لما البيبي يعرف يصلب ضهره ويعرف يقعد لوحده بعد الشهر السادس – لازم الأم تشك في نوع من الحول اسمه " الحول الدوراني " ... الحول ده هو أشهر سبب لعوجة الرقبة عند البيبيهات

طيب ايه الحول الدوراني ده .. وازاي بيعوج الرقبه ؟

نتكلم الأول عن البيبي الطبيعي .. لما تكون العينين زي بعض طبيعيين مفيهمش حاجه .. كل عين بتشوف صوره عاديه وحلوه زي العين التانيه .. وبعدين المخ ياخد الصورتين اللي زي بعض دول يحطهم على بعض في مكان في المخ اسمه مركز الاتحاد فنشوف صوره واحده 

لكن في الحول الدوراني يا جماعه عين من الاتنين بتكون بتلف حوالين نفسها وهي في مكانها .. فالعين دي تشوف الصوره مايله مش معدوله .. البيبي اللي عنده حول دوراني بيبان طبيعي خالص معندوش أي حول لأن العين بتكون في الوسط عادي .. لكن المخ بيوصله صورتين .. صورة العين السليمه عاديه ومعدوله وصورة العين المريضه مايله ومعووجه .. المخ هنا مش بيعرف يحط الصورتين على بعض .. طيب يعمل ايه البيبي عشان مخه يعرف يحط الصورتين على بعض .. يعوج رقبته زي " علي " كده عشان يعدل صورة العين المايله .. يفضل كده على طول .. مهما نزعق فيه ونقوله اعدل رقبتك يا " علي " برضه بيعوجها .. بياكل وهو كده .. بيلعب وهو كده .. بيتفرج على الكرتون وهو كده .. بيلعب بالموبايل وهو كده.

طيب الحول الدوراني ده علاجه ايه ؟

علاج الحول الدوراني عمليه .. ملهوش علاج تاني .. الطفل هيفضل كده .. رقبته مش هتتعدل الا بعمليه .. في العمليه احنا بنرجع العين للوضع الطبيعي عشان تشوف الصوره معدوله مش مايله .. فطبعاً الطفل بعد العمليه على طول بنلاقي رقبته اتعدلت .. خلاص الصورتين وصلوا للمخ معدولين زي بعض وعرف يحطهم على بعض في مركز الاتحاد ويشوفهم صوره واحده من غير مايعوج رقبته ولا حاجه.    

د. جمــال صبـــحي