حالة هذا الأسبوع : جنى م. م. .. 8 سنوات .. من امبابة

" " متلازمة دوين

اولاً احب اشكر مامة جنى انها سمحت لي انزل صورتها في حالة هذا الاسبوع

" دوين هو اسم الراجل اللي اكتشف المرض الغريب ده "

انا حابب اشرح لكم متلازمة دوين عشان دايماً العيانين بيسألوني عليه .. هو صحيح يا دكتور دوين ده مالوش علاج ؟؟؟ .. بنتي يا دكتور حتفضل طول عمرها كدة ؟؟؟

متلازمة دوين يا جماعة مرض خلقي .. يعني الطفل بيتولد كدة .. سببه ان الاعصاب اللي بتحرك العين بتشتغل غلط .. ييجي الانسان يبص يمين مثلاً يقوم العصب بتاع الحركة الشمال هو اللي يشتغل فالعين متعرفش تروح يمين .. أو العكس كمان بيحصل فالعين متعرفش تروح شمال .. وساعات بيبقى السلك ضارب خالص فالعين متعرفش تروح لا يمين ولا شمال ..وعشان كدة نلاقي الدكاترة يقولوا للأم : " بنتك يا مدام عندها متلازمة دوين من النوع الأول أو النوع التاني أو الثالث " .. حسب العين مش عارفة تروح فين .. زي ماشرحنا ..

حاجة تانية بتحصل في متلازمة دوين نتيجة ان العضلة اليمين والعضلة الشمال بيشدوا العين في نفس الوقت فالعين تتشد للوراء .. فنلاقي العين تضيق وتبان اصغر من العين التانية زي حالة جنى كدة في الصورة قبل العملية لما بصت ناحية الشمال نلاقي عينها اليمين اللي فيها دوين بقت اضيق من العين الشمال

حاجة تالتة بتحصل في الاطفال دول لما ييجوا يبصوا للجنب تلاقي العين اللي فيها دوين بتطلع لفوق – وساعات بتنزل لتحت – زي جنى كدة لما جت تبص للجنب عينها اللي فيها دوين طلعت لفوق

حاجة رابعة بتحصل مع دوين ان العيان وهو باصص لقدام .. عادي يعني .. بيبقى عنده حول .. ساعات حول انسي يعني العين تنحرف لجوة وساعات وحشي يعني العين تنحرف لبرة

آخر حاجة بتحصل في دوين ان العيان بيعوج رقبته عشان مش عارف يحرك عينه للجنب – بيبص براسه يعني مش بعينيه –

طيب هو مرض متلازمة دوين الغلز ده ليه عملية  ؟؟

اقول لكم بصراحة .. العملية يا جماعة مش بترجع كل الحاجات اللي قلناها دي .. بترجع حاجات ومش بترجع حاجات لكن عموماً العيان بيبقى احسن الف مرة بعد العملية ودايماً الاقي عيان دوين بعد العملية بيبقى مبسوط قوي بالحاجات اللي اتعالجت

ايه اللي بيتعالج في دوين وايه اللي ما بيتعالجش ؟؟؟

الحاجة التانية والتالتة والرابعة والخامسة بتتعالج بالعملية لكن اول حاجة لأ

زي حالة جنى كدة

يعني اذا كان فيه حول انسي او وحشي بيتعالج بالعملية

والعين مش حتضيق تاني بعد العملية

والعين مش حتطلع لفوق تاني بعد العملية

ورقبتها مش حتتعوج تاني بعد العملية

لكن فيه حاجة مهمة عند جنى مش حتتعالج بالعملية ان العين برضه لما تيجي تبص يمين مش حتعرف لأن العضلة الشمال بتشدها ومتخلهاش تروح يمين – الاسلاك المطرقعة اللي قلنا عليها –

صدقوني يا جماعة نتايج العمليات عند الاطفال دول ممتازة .. وبلاقي الاب والام فرحانين جداً بعد العملية بالانجاز اللي تم .. حوالي 90% من المشكلة اتحلت .. زي عملية جنى  كدة ...

حمد الله على سلامتك يا حبيبتي  .. والف مبروك...

د. جمــال صبـــحي