حالة هذا الأسبوع ( 59 ) عبد الله القاضي .. 9 شهور .. من قنا

" متلازمة دوين "

بمناسبة العملية الرائعة بتاعة عبد الله هنشرح النهاردة المرض ده لأن الأم اللي البيبي بتاعها عنده دوين بتبعت على الصفحة تسألني اسئلة كتير قوي .. انا دلوقتي هأقول كل حاجة عن دوين

متلازمة دوين يا جماعة مرض خلقي .. يعني الطفل بيتولد كده .. في المرض ده عضلات العين بتشتغل بطريقة غريبة جداً .. وحاجات كتيرة بتحصل

1. اول حاجة بتحصل ان العين مبتعرفش تروح يمين أو شمال وساعات مبتعرفش تروح لا هنا ولا هنا .. وده سببه ان الاعصاب اللي بتحرك العين بتتلخبط .. يعني مثلا ييجي الطفل يبص لليمين يقوم العصب بتاع الحركة الشمال هو اللي يشتغل ويشد العين ناحيته .. فالعين متعرفش تروح لليمين .. وساعات العكس فالعين متعرفش تروح للشمال .. وساعات تبقى الدنيا متلخبطة خالص فالعين متعرفش تروح لا لليمين ولا للشمال

2. تاني حاجة بتحصل في متلازمة دوين اننا نلاقي العين تضيق وتبان اصغر من العين التانية

3. تالت حاجة بتحصل في الاطفال دول لما ييجوا يبصوا للجنبِ تلاقي العين اللي فيها دوين بتطلع لفوق – وساعات بتنزل لتحت - زي عبد الله كده .. عينه بتنزل لتحت

4. رابع حاجة بتحصل ان الطفل وهو باصص لقدام .. عادي يعني .. بيبقى عنده حول .. ساعات حول انسي وساعات وحشي

5. آخر حاجة بتحصل في دوين ان الطفل بيعوج رقبته عشان مش عارف يحرك عينه للجنب – بيبص براسه يعني مش بعينيه –

طيب هو مرض متلازمة دوين الملخبط ده العملية بتقدر تعالج كل الحاجات دي  ؟؟

بصراحة يا جماعة .. العملية بتعالج حاجات كتير قوي عند الاطفال دول ومش بتعالج حاجات تانية .. لكن عموماً الطفل بيبقى احسن الف مرة بعد العملية ودايماً الاقي الامهات بعد العملية بيبقوا مبسوطين جداً بالحاجات اللي اتعالجت عند ولادهم

طيب ايه يا جماعة اللي بيتعالج في دوين وايه اللي ما بيتعالجش ؟؟؟

أولا: اذا كان فيه حول انسي او وحشي بيتعالج بالعملية

ثانيا: العين مش حتضيق تاني بعد العملية وهتبقى في نفس وسع العين التانية

ثالثا: العين مش حتطلع لفوق أو تنزل لتحت تاني بعد العملية

رابعا: رقبة الطفل مش حتتعوج تاني بعد العملية

لكن فيه حاجة مهمة عند الطفل مش بتتعالج بالعملية بنسبة 100% وهي ان العين برضه لما تيجي تبص للجنب مش هتروح للآخر ولازم الامهات يعرفوا الحكاية دي قبل العملية ورغم كده انا بلاقي الاهل فرحانين جداً بعد العملية بالتغيير اللي حصل لابنهم .. حوالي 90% من المشكلة اتحلت .. زي عملية عبد الله كده ...

حمد الله على سلامتك يا ابني  .. والف مبروك...

د. جمــال صبـــحي