حالة هذا الأسبوع  ( 245 )  آمال 18 سنه  .. من قنا

" الحول الأنسي والعين الضعيفة  "

عايز اتكلم النهارده عن اهمال علاج ضعف النظر

آمال في سنة أولى كلية الاداب .. من اسبوعين كده جت لي العياده مع باباها ومامتها

قالوا لي ان آمال كانت مولودة طبيعية خالص .. وهي عندها 6 سنين ظهر عندها الحول .. راحوا بيها لدكاتره كتير .. كلهم قالوا محتاجه نضاره عشان عندها عين قويه وعين ضعيفه .. كانت صغيرة ومش بترضى تلبس النضاره على طول

لما كشفت على آمال لقيت العين الشمال ممتازه .. سته على سته .. بس اليمين فيها قصر نظر 3 درجات .. هو صحيح قصر نظر مش جامد لكن عشان هي مش منتظمة في النضاره ومركزه طول الوقت بالعين السليمه بس .. فالعين اليمين ضعفت أكتر وطبعاً ظهر فيها الحول

دلوقتي آمال محتاجه حاجتين .. مينفعش نعمل حاجة ونسيب التانية .. أول حاجه لازم نعدل الحول ده بعمليه .. والحاجه التانيه لازم تلبس نضاره عشان نحسن نظر العين دي .. ولو مش عايزة نضاره يبقى تعمل ليزك بعد عملية الحول

المهم .. عملت لآمال العمليه .. وبالمناسبة عادة عملية الحول الأنسي بتكون في العينين مش في عين واحدة .. النهاردة آمال بعتت على الفيس رسالة في منتهى الرقة فيها صورتها .. بسم الله ما شاء الله .. البنت بقت زي القمر .. حاجة تانية خالص ولسه لما الاحمرار ده يروح هتبقى أجمل وأجمل

الف مبروك يا بنتي وحمد الله على السلامه