حالة هذا الأسبوع  ( 135 )  صلاح مؤمن صلاح .. 8 سنين  .. من سواده .. المنيا

" الحول الأنسي والعين الكسلانه  "

بمناسبة حالة صلاح عايز اتكلم النهارده عن اهمال علاج الحول عند الأطفال

والد صلاح جالي العياده من الصعيد الجواني

أنا :  الحول ده عند صلاح من إمتى يا عم مؤمن ؟

عم مؤمن : الحول ظهر وهو عنده سنتين كده .. يعني من 6 سنين تقريباً

أنا : طيب سايبه كده طول السنين دي ليه يا حاج ؟

عم مؤمن : لا والله ما سبناه .. رحنا بيه لدكاتره كتير .. كلهم قالوا محتاج نضاره عشان عنده عين قويه وعين ضعيفه .. كان عيل بقى ورفض يلبس النضاره .. قلنا نسيبه لما يكبر شويه ونبقى نشوف حل

قمت كشفت على صلاح .. لقيت فعلاً عنده العين اليمين ممتازه .. سته على سته .. بس الشمال الحوله نظرها ضعيف جداً .. يدوبك شايف العلامه الكبيره بالعافيه .. ولقيت فيها طول نظر حوالي 3 درجات هو صحيح مش كتير لكن عشان الولد مش بيلبس نضاره طول السنين دي وكان مركز طول الوقت على العين السليمه .. فالعين الشمال ضعفت  وبقى نظرها وحش قوي وكمان ظهر فيها الحول .. وكل شويه الضعف هيزيد والحول برضه هيزيد

أنا : طيب يا عم مؤمن .. صلاح محتاج حاجتين مع بعض .. أول حاجه .. لازم يلبس نضاره ونغطي العين السليمه ويبص بالعين الضعيفه بس حوالي 3 ساعات في اليوم عشان ننشط نظر العين دي

والحاجه التانيه لازم نعدل الحول ده بعمليه .. لأن لما العين نظرها يتحسن مع التغطيه .. الحول هيخلي العين تضعف تاني .. يبقى لازم نعمل الحاجتين مع بعض .. مينفعش نعمل حاجه واحده .. لازم ننشط النظر ولازم برضه نعدل الحول .. ولو مكسوفين أوي من النضاره يبقى يعمل ليزك لما يوصل 18 سنه ان شاء الله

المهم .. عملت لصلاح العمليه والحول اتعدل تماماً   .. بعد العمليه على طول بدأنا جلسات التنشيط والنضاره .. بعد 3 شهور صلاح جالي تاني ولقيت الحمد لله نظر العين الشمال اتحسن جداً .. يعني الولد بقى زي الفل .. دي صورته دلوقتي .. حاجه تانيه خالص .. شكله بقى قمر .. والعين كمان نظرها بيتحسن

الف مبروك يا ابني وحمد الله على السلامه

د. جمــال صبحــي