حالة هذا الاسبوع ( 166 ) .. خالد عز الدين 29 سنة من الصعيد  

" ازاي تعرف لوحدك عمليتك ناجحة ولا لأ ؟ "

( أولاً باشكرك يا خالد بشدة انك وافقت تنزل صورتك على صفحتي عشان يستفيد من موضوعك المهم ده كل العيانين التانيين اللي بيتكسفوا حتى اني اصورهم أو يبعتوا لي صورهم )

كتير من العيانين بيسألوني بعد العملية السؤال الشهير :

هي عمليتي نجحت ولا لأ ؟ .. هو الحول اللي كان عندي اتعدل ولا لسه ؟

وساعات باشوف عيان بعد ما عمل العمليه شكله مش مبسوط وحاسس ان لسه عنده حول .. مع ان الحول اللي كان عنده بألقاه اتعدل خالص .. بس ساعات العين بعد عملية الحول بتكون لسه وارمة شوية أو لسه ضيقة شوية .. لسه مافتحتش على الآخر زي العين التانية فتعمل احساس غلط ان لسه فيه شوية حول .. زي خالد عز الدين كده ..  كان جالي من الصعيد من حوالي شهر بيشتكي من حول أنسي في عينه الشمال .. عملت له العملية وسافر تاني يوم الصعيد .. ومن ساعتها كل يوم .. فعلاً كل يوم .. خالد يصور نفسه ويبعت لي صوره على الواتس ويقول لي يا دكتور جمال لسه عيني فيها حول .. لسه الحول زي ما هو .. حسيت في كلامه انه زعلان جداً ومش مبسوط بنتيجة العملية .. وزي مانتم عارفين وانا دايماً بأكتب ان رضا المريض عن نفسه بعد العملية هو أهم حاجة عندي .. لازم العيان يكون هو راضي عن اللي حصل .. لازم هو شخصياً يقتنع ان دلوقتي معندوش حول

طيب الكلام ده انا كاتبه لخالد ولأي عيان تاني عمل العملية عندي أو عملها عند أي زميل تاني وباعت لي صورته في رسالة بيسألني فيها عن رأيي في نتيحة العملية

ازاي تعرف بنفسك من غير دكتور ان العين فيها حول ولا مفيش .. ازاي تعرف لوحدك عمليتك ناجحة ولا لأ ؟

الموضوع في منتهى البساطة .. امسك الموبايل .. شغل الكاميرا .. شغل الفلاش .. امسك الموبايل قدامك على طول .. بص قدامك مش للجنب .. التقط صوره بالفلاش وانت باصص قدامك على طول .. اخدت الصوره خلاص .. اسموا بقى .. بصوا يا جماعة على الصوره ..  بصوا على النقطه البيضا الصغيره اللي هي انعكاس الفلاش على العين .. بصوا عليها كويس وشوفوا النقطه البيضا موجودة فين

لو النقطه البيضا موجودة في وسط النني في عين .. بس مش في وسط النني في العين التانية .. يبقى فيه حول .. قولاً واحداً .. مفيش فصال .. وساعتها العيان لازم يعرف وبنقول له على طول ان عمليته لسه محتاجة اجراء تاني بسيط عشان شوية الحول اللي فاضلين دول يتعدلوا كمان .. يعني مش كارثة قومية ولا حاجة هنهرب منها أو ننكرها .. الموضوع أبسط من كده بكتير

طيب ولو النقطه البيضا دي موجوده في وسط النني بالظبط في العين اليمين وبرضه في وسط النني بالظبط في العين الشمال يبقى مفيش أي حول .. قولاً واحداً برضه . . مفيش حول يعني مفيش حول .. ما دام النقطه البيضا في وسط النني يبقى خلاص .. مينفعش بعد كده نقول بس انا حاسس أن عيني دي داخلة لجوة شويه .. ولا نقول عيني دي لسه فيها حول شويه .. ولا نقول اصحابي بيقولوا ان عيني لسه فيها حول .. ولا ييجي عيان يقول لي هي عمليتي ناجحة يا دكتور جمال ؟  .. شوف انت بنفسك .. مش لازم انا اقول لك .. شوف النقطه فين واحكم بنفسك ..

خلاص يا جماعه .. الموضوع واضح كده .. واضح ازاي تعرف أو تعرفي عمليتك ناجحه ولا لأ

د. جمـــال صبحي