حالة هذا الأسبوع ( 203 ) فاطمة نوح  .. 8 سنوات .. من سوهاج

" فرط نشاط العضلة المائلة "

فيه انواع حول كتير يا جماعه العيان وهو باصص قدامه بيكون شكله طبيعي وعادي جداً .. لكن ييجي يبص لاتجاه معين يظهر حول بوضوح .. زي نوع الحول اللي هأكلمكم عنه النهارده

اسم الحول ده زيادة نشاط - أو فرط نشاط - العضلة المائلة .. العيانين اللي عندهم الحول ده وهما باصين قدامهم بيكون شكلهم طبيعي خالص مفيش أي حول .. زي فاطمة كده .. فاطمة وهي باصه قدامها شكلها بيكون عادي مفيش أي حاجه .. لكن تيجي تبص للجنب نلاقي عينها طلعت لفوق واختفت تماماً وبقى شكل البنت غريب جداً

طيب ايه سبب الحول ده ؟

سبب الحول ده هو نشاط زائد في العضلة المائله .. احنا قلنا قبل كده ان كل عين بيحركها 6 عضلات .. 4 عضلات مستقيمه وعضلتين مائلتين .. ساعات عضله من العضلات المائلة بتكون قويه أزيد من الطبيعي .. فلما العيان يبص للجنب العضله دي تشد العين لفوق .. فيحصل المنظر ده اللي انتم شايفينه في صورة فاطمة قبل العمليه

طيب السؤال هنا .. في حاله زي دي يا دكتور جمال نسيب البنت كده مادام وهي باصه قدامها كويسه ومفيش حاجه .. ولا نعملها عمليه

طبعاً لازم نعملها عمليه .. ازاي يعني نسيب بنت زي القمر كده كل أما تبص للجنب عينها تطلع لفوق ويبقى شكلها بالمنظر ده .. طيب هي تعيش إزاي كده .. تبطل يعني تبص يمين وشمال ولا تفضل باصه قدامها على طول ولا تعمل ايه يعني .. لأ طبعاً لازم تعمل عمليه ..

انا فهمت مامة فاطمة الموضوع .. وأقنعتها بأهمية العمليه وإزاي ان البنت لازم يكون شكلها طبيعي وهي بتبص في أي اتجاه مش قدامها بس .. والعمليه ناجحه ان شاء الله .. والمنظر الغريب ده مش هيظهر تاني أبداً بعد العمليه

المهم .. عمليه فاطمة الحمد لله كانت ممتازه والنتيجه كانت هايله .. عينها بطلت تعمل كده خلاص .. فاطمة تقدر تبص للجنب زي ماهي عايزه .. المشكلة انتهت خلاص

حمد الله على سلامتك يا فاطمة .. والف مبروك يا حبيبتي

د. جمــال صبـــحي