حالة هذا الأسبوع ( 212 ) .. فريدة محمود نجيب .. من أسوان

" الحول الوحشي المتقطع "

كل يوم ياجماعة افتح صفحتي ألاقي عشرات الأمهات بعتوا نفس الرسالة تقريباً  :

( انا ابني أو بنتي يادكتور عندها حول بس مش على طول .. ساعات يبقى فيه حول وساعات مفيش .. عينيها تبقى طبيعية خالص وفجأة تحول لبره .. تقعد ثواني وبعدين ترجع طبيعية تاني .. اسمه ايه الحول ده .. وعلاجه ايه ؟ )

طيب ده ياجماعه اسمه الحول الوحشي المتقطع ( وحشي يعني العين بتحدف لبره ومتقطع يعني مش على طول .. ساعات يبقى فيه حول وساعات مفيش )

 لو ابنك أو بنتك عندها حول وحشي متقطع يبقى لازم تقرأ الكلام ده لأن أنا كاتب الإجابات بتاعة كل أسئلتك

·     ايه سبب الحول الوحشي المتقطع .. وليه ساعات العين تكون معدوله وساعات تكون حوله ؟

ج : طيب .. ببساطه .. سبب الحول ده ان العضله اللي بتشد العين لبره بتكون اقوى من العضله اللي بتشد العين لجوه .. فكل شويه العين تحول لبره .. المخ بياخد باله ان فيه حاجه غلط وان العين حدفت لبره .. فيشد العين لجوه تاني عشان تتعدل .. ساعات العين تتعدل لوحدها وساعات الطفل بيعرف يعدلها بنفسه.

·     طيب فيه حاجات معينة تخلي العين تحول ؟

ج: فعلاً .. معظم الناس بيقولوا ان فيه حاجات معينه تخلي الحول يظهر .. منها السرحان .. التركيز الشديد .. فلاش الكاميرا .. الخروج في الشمس .. الصحيان من النوم .. الاجهاد والتعب والمرض .. يعني حاجات كتير .. وساعات الحول بيظهر لوحده من غير اي سبب

·     بنتي عندها سنه ونص وعندها حول وحشي متقطع .. ممكن لما تكبر شويه الحول ده يخف لوحده ؟

ج:  للأسف مش ممكن .. الحول الوحشي المتقطع مش بيخف لوحده أبداً .. هيفضل كده على طول

·     طيب هو ممكن يزيد مع الوقت ؟

ج: ممكن يزيد وممكن لأ .. بس برضه مش هيروح مع الوقت

·     هو الحول الوحشي المتقطع زي الحول الدائم ممكن يضعف العين ويعمل كسل ؟

ج: العين نظرها مش بيضعف أبداً من الحول المتقطع لأن كل شويه العين بتتعدل وتبص طبيعي خالص عشان كده نظرها مش بيضعف .. أنواع الحول التانيه اللي العين فيها ما بتتعدلش هي اللي بتضعف النظر وبيحصل فيها كسل

·     هو الحول ده فعلاً علاجه عمليه .. مفيش حل تاني ؟

ج: صحيح .. الحول الوحشي المتقطع لايمكن نمنعه من الظهور إلا بعمل عمليه .. النظاره والتمارين علاج مش مؤكد للحول المتقطع .. الحل الأكيد هو العمليه

·     طيب ليه نعمل عمليه مادام الحول ده مش بيضعف  النظر ؟

ج: عشان الشكل .. صحيح انا بأقول دايماً ان الحول المتقطع ده ملوش أي ضرر على العين الا ان مفيش أم بتوافق أبداً انها تسيب ابنها او بنتها تحول بالمنظر ده .. ومفيش برضه شاب او شابه يقبل ان عينه تحول بالمنظر ده وهو قاعد ولا قاعده مع اصحابهم وزمايلهم ..  ودايماً يطلبوا مني انهم يعملوا عمليه عشان الحول المؤقت ده ما يظهرش عندهم تاني

·     طيب ايه انسب سن لعمل العمليه ؟

ج: أنسب سن لعمل العملية هو 4 سنين .. عادة الأطفال دول بييجوا لي على دخول المدارس كده لما يبدأوا يخرجوا ويشوفوا الناس والناس تشوفهم بييجي الأب والأم يدوروا على حل للمشكلة

·     يعني مينفعش نعمل العملية قبل سن 4 سنين ؟

ينفع .. بس في حالة واحدة بس ان يكون الحول بيظهر كتير جداً .. يعني الفترات اللي فيها العين بتتعدل بتكون أقل من الفترات اللي فيها بتكون العين حولة

·     طيب رأيك انت ايه يا دكتور .. نعمل العمليه امتى ؟

ج: في الحقيقه ميعاد عملية الحول الوحشي المتقطع مش الدكتور هو اللي بيحدده .. العيان هو اللي بيحدد ميعاد العمليه .. لو الحول بيظهر قدام الناس وعامل للعيان حرج وكده .. يبقى يطلب عمل العمليه .. احنا قلنا الحول ده ملهوش ضرر .. العمليه بتتعمل عشان الشكل .. عشان الحول ميظهرش .. لو الأم شايفه ان الحول هيأثر على نفسية ابنها او بنتها يبقى تعمل العمليه .. لو ولد أو بنت الحول بيظهر عندهم في الفصل أو الجامعه او الشغل قدام اصحابهم وزمايلهم .. طبعاً يعملوا العمليه .. يعيشوا في الحرج والكسوف ده ليه مادام الموضوع له حل .. وحل مضمون .. ليه يقبلوا يعيشوا كده

·     العمليه بتبقى في عين واحده ولا الاتنين ؟

ج: عادةً بتكون في الاتنين

·     طيب نسبة نجاح العملية كام في الميه ؟

ج: نسبة نجاح عملية الحول الوحشي المتقطع تقريباً 100% وفعلاً بعد العمليه الحول مش بيظهر أبداً

·     طيب ممكن يحصل مضاعفات من العمليه ؟

ج: آه .. فيه حاجتين ممكن يحصلوا عند عدد قليل جداً من المرضى أول حاجه انه يظهر عندهم بعد العمليه حول انسي بسيط جداً وده بيروح لوحده خلال شهرين من العمليه ونادراً لما بيحتاج عملية عشان نصلحه وبرضه بعدها الطفل بيبقى زي الفل .. تاني حاجه ممكن تحصل ان العيان ممكن يشوف ازدواج في الرؤيه بعد العملية وبرضه ده بيروح لوحده بعد يومين تلاته من العمليه .. بس بأقول تاني ده عند عدد بسيط جداً من العيانين

مامة البنت القمر دي سألتني كل الاسئلة دي وقررت تعمل العملية لفريدة .. عندها حق طبعاً .. لما الحول بيظهر عندها شكلها بيتغير خالص .. وبعد شوية هتخش المدرسة والناس هتشوفها كده .. لأ .. لازم نشوف حل

دي صورة فريدة بعد العملية .. مامتها بعتتهالي من اسوان النهاردة وقالت لي لازم تنزلها على صفحتك ..  الحمد لله رب العالمين .. فريدة بقت زي الفل خلاص

الف حمد الله على سلامتك يابنتي ..  والف مبروك