حالة هذا الأسبوع ( 243 ) .. محمد مصطفى .. 5 سنين .. من أسوان

" الحول الوحشي المتقطع "

" بكار " الأسواني العسل ده عملت له عملية من حوالي اسبوع .. كان عنده حول وحشي متقطع .. فرصة النهاردة أكلمكم تاني عن الحول ده لاننا بنشوفه كتير قوي .. وحشي يعني العين بتحدف لبره ومتقطع يعني مش دائم .. يعني ساعات يبقى فيه حول وساعات مفيش .. سبب الحول ده ان العضله الخارجية بتكون اقوى من العضله الداخلية .. فكل شويه العين تحول لبره فالمخ ياخد باله ان العين حدفت لبره .. فيشد العين لجوه عشان تتعدل .. وعشان كده العين نظرها مش بيضعف أبداً من الحول المتقطع لأن كل شويه العين بتتعدل وتبص طبيعي .. طيب ليه بنعمل عمليه مادام الحول ده مش بيضعف  النظر ؟ .. عشان الشكل .. مفيش أم ترضى تسيب ابنها او بنتها تحول بالمنظر ده .. وأنسب سن يا جماعه لعمل عملية الحول الوحشي المتقطع هو سن 4 سنين وعادةً العملية بتكون في العينين ونسبة نجاحها هايلة  .. بس فيه حاجتين ساعات يحصلوا عند عدد قليل جداً جداً من المرضى أول حاجه انه يظهر عندهم بعد العمليه حول انسي بسيط جداً وده بيروح لوحده في حد أقصى شهرين من العمليه ونادراً لما بنحتاج عملية تاني عشان نصلحه .. تاني حاجه ممكن تحصل ان ممكن يحصل ازدواج في الرؤيه وبرضه ده بيروح لوحده

الف حمد الله على سلامتك يا " بكار " ..  عمليتك حلوة قوي الحمد لله