حالة هذا الأسبوع  ( 286 ) .. آيات .. 7 سنين .. من بني سويف

" الحول الوحشي المتقطع "

حول متقطع يعني مش دائم .. يعني ساعات العين تبقى حادفة لبره كده – زي صورة آيات قبل العملية - وساعات ما يكونش فيه حول خالص

دي أشهر الأسئلة اللي العيانين بيسألوها دايماً عن الحول الوحشي المتقطع :

" هو الحول المتقطع ممكن يضعف النظر ؟ "

-         العين نظرها مش بيضعف أبداً من الحول المتقطع لأن كل شوية العين بتتعدل وتبص طبيعي .. عشان كده نظرها مش بيضعف

" طيب ليه نعمل عملية مادام الحول ده مش بيضعف النظر ؟ "

-         رغم اني فعلاً بأقول للأمهات ان الحول المتقطع ملوش أي ضرر الا ان مفيش أم بتوافق أبداً انها تسيب بنتها تحول بالمنظر ده ودايماً يطلبوا مني انهم يعملوا عملية عشان الحول ده ما يظهرش تاني

" هو الحول ده ملوش علاج إلا العملية ؟ "

الحول الوحشي المتقطع لايمكن نمنعه من الظهور إلا بعمل العملية قولاً واحداً .. النظارة والتمارين علاج مش مؤكد للحول المتقطع .. ساعات بتنفع وغالباً لأ.

" طيب نسبة نجاح العملية كام في المية ؟ "

نسبة نجاح عملية الحول الوحشي المتقطع تقريباً 100%

" طيب ايه انسب سن لعمل العملية ؟ "

سن 4 سنين هو أنسب سن لعمل عملية الحول الوحشي المتقطع

" طيب ممكن تتعمل في سن أصغر من كده ؟ "

لو الحول بيظهر كتير أوي يبقى العملية تتعمل طبعاً في أي سن مش لازم 4 سنين

ألف حمد الله على سلامتك يا آيات

عمليتك حلوة جداً