حالة هذا الأسبوع  ( 301 ) ألين تاج الدين .. 4 سنين .. من السودان

" الحول الوحشي المتقطع "

حول متقطع يعني مش دائم .. يعني ساعات العين تبقى حادفة لبره كده – زي صورة ألين قبل العملية - وساعات ما يكونش فيه حول خالص

دي أشهر الأسئلة اللي العيانين بيسألوها عن الحول الوحشي المتقطع :

" هو الحول المتقطع ممكن يضعف النظر ؟ "

-        العين نظرها مش بيضعف أبداً من الحول المتقطع لأن كل شوية العين بتتعدل وتبص طبيعي .. عشان كده نظرها مش بيضعف

" طيب ليه نعمل عملية مادام الحول ده مش بيضعف النظر ؟ "

-        رغم ان الحول المتقطع ملوش أي ضرر الا ان مفيش أم بتوافق أبداً انها تسيب بنتها تحول بالمنظر ده ودايماً يطلبوا مني انهم يعملوا عملية عشان الحول ده ما يظهرش تاني

" هو الحول ده ملوش علاج إلا العملية ؟ "

الحول الوحشي المتقطع لايمكن نمنعه من الظهور إلا بعمل العملية قولاً واحداً .. النظارة والتمارين علاج مش مؤكد للحول المتقطع .. ساعات بتنفع وغالباً لأ.

" طيب نسبة نجاح العملية كام في المية ؟ "

نسبة نجاح عملية الحول الوحشي المتقطع تقريباً 100%

" طيب ايه انسب سن لعمل العملية ؟ "

سن 4 سنين هو أنسب سن لعمل عملية الحول الوحشي المتقطع

" طيب ممكن تتعمل في سن أصغر من كده ؟ "

ممكن لو الحول بيظهر كتير أوي وبدأ يتحول لحول دائم مش متقطع

*******************************

د. جمال الدين احمد صبحي

رئيس قسم الحول

بالمعهد التذكاري للأبحاث الرمدية