حالة هذا الأسبوع  ( 303 )

إبراهيم عوض التوم .. 8 سنين .. من السودان

" الحول الوحشي المتقطع "

بمناسبة العملية الجميلة دي أحب أقول لكم أهم الأسئلة اللي المرضى بيسألوها دايماً عن الحول الوحشي المتقطع :

" يعني ايه وحشي متقطع يا دكتور جمال ؟ "

- وحشي يعني العين حوله للخارج .. متقطع يعني مش حول دائم .. يعني ساعات العين تبقى حوله كده زي صورة ابراهيم قبل العمليه .. وساعات ميكونش فيه حول خالص

" هو الحول المتقطع ممكن يضعف النظر ؟ "

-         العين نظرها مش بيضعف أبداً من الحول المتقطع لأن كل شوية العين بتتعدل وتبص طبيعي .. عشان كده نظرها مش بيضعف

" طيب ليه نعمل عملية مادام الحول ده مش بيضعف النظر ؟ "

-         رغم اني فعلاً بأقول للأمهات ان الحول المتقطع ملوش أي ضرر الا ان مفيش أم بتوافق أبداً انها تسيب ابنها او بنتها تحول بالمنظر ده ودايماً يطلبوا مني انهم يعملوا عملية عشان الحول ده ما يظهرش تاني .. والدليل ابراهيم أهو جاي من السودان قبل دخول المدارس بكام يوم عشان يعمل العمليه ويخلص من المشكله دي

" هو الحول ده ملوش علاج إلا العملية ؟ "

-         فعلاً الحول الوحشي المتقطع لايمكن نمنعه من الظهور إلا بعمل العملية قولاً واحداً .. النظارة والتمارين علاج مش مؤكد للحول المتقطع .. ساعات بتنفع وغالباً لأ.

" طيب نسبة نجاح العملية كام في المية ؟ "

-         نسبة نجاح عملية الحول الوحشي المتقطع عاليه جداً بتوصل ل 95%

" طيب ايه انسب سن لعمل العملية ؟ "

-         بنعملها من سن 4 سنين

" طيب ممكن تتعمل في سن أصغر من كده ؟ "

-         لو الحول بيظهر كتير أوي يبقى العملية تتعمل طبعاً في أي سن مش لازم 4 سنين

" انت معروف عنك الصراحة يا دكتور جمال .. قلنا ايه المشاكل اللي ممكن تحصل في عملية الحول الوحشي المتقطع "

-         عدد قليل جداً من المرضى ممكن يحصل لهم حاجتين .. أول حاجه إن المريض ممكن يحصل له ازدواج في الرؤية .. بس ده بيكون عرض مؤقت بيختفي لوحده بعد كام يوم .. تاني حاجه ممكن يحصل حول أنسي معكوس .. وده برضه بيخف لوحده في مدة لاتزيد عن شهرين ونادراً جداً لما بيحتاج عمليه تانيه

ألف حمد الله على سلامتك يا ابراهيم يا توم .. عمليتك زي الفل الحمد لله

بس ابقى افتكرني لما تكبر

د. جمال الدين احمد صبحي

رئيس قسم الحول

بالمعهد التذكاري للأبحاث الرمدية

*******************************