حالة هذا الأسبوع  ( 331 )

مارية محمد .. 6 سنين .. من القاهرة

" الحول الوحشي المتقطع "

البنت القمر دي جت لي مع مامتها من أسبوعين كده عندها الحول المشهور اللي كلكم حفظتوه خلاص .. الحول الوحشي المتقطع

مامتها كلمتني بمنتهى الصراحة .. قالت لي نفس الكلام اللي بعض الأمهات بيعلقوا بيه على حالات هذا الأسبوع .. نفس التعليقات السلبية .. طيب وأنا أضمن منين ان العملية هتنجح .. طيب ما هو ممكن بعد العملية الحول يرجع تاني .. طيب ما هو ممكن يحصل بعد العملية حول أنسي زي ما انت كاتب انه بيحصل بعد عمليات الحول الوحشي المتقطع .. طيب ما هو ممكن يحصل ازدواج في الرؤية ..

طبعاً أنا أرفض تماماً اننا نسيب بنت جميلة زي مارية كده تحول كل شوية قدام اصحابها في المدرسة عشان خايفين من كل السلبيات اللي بنسمعها عن نتائج عملية الحول الوحشي المتقطع

يا جماعة أنا هأكرر نفس الكلام اللي قلته قبل كده كتير قوي .. وبأقوله في عيادتي لكل الأمهات اللي ولادهم عندهم الحول ده .. الحول ده نسبة نجاح عمليته عالية جداً .. نادراً لما نحتاج عملية تاني عشان نعدل الحول ده .. عادة بيتعدل من عملية واحدة .. وحتى لو حصل بعض المشاكل عند قليل من المرضى زي الحول المعكوس أو ازدواج الرؤية فكلها مشاكل ليها حلول .. مش معقول نبطل نعمل العمليات لمرضى الحول الوحشي المتقطع كلهم عشان عارفين ان 5% منهم ممكن يحصل لهم بعض المشاكل دي

انا لما باشوف بنت جميلة زي مارية كده وازاي بقت قمر فعلاً بعد العملية كل ما بيزيد ايماني واقتناعي اننا ما نسيبش ولادنا أبداً تحت رحمة هذا المرض اللعين

حمد الله على سلامتك يا حبيبتي

يارب تفتكريني لما تكبري