حالة هذا الأسبوع ( 336 )

ريتاج .. 6 سنين .. من البحيرة

أولاً لازم اشكر مامة ريتاج انها وافقت انزل صورتها على صفحتي

" الحول الوحشي المتقطع "

بمناسبة البنت اللي زي القمر دي بتاعة حالة النهارده أحب أكلمكم تاني عن الحول الوحشي المتقطع .. حول متقطع يعني مش دائم .. يعني ساعات العين تبقى حادفة لبره كده – زي صورة ريتاج قبل العملية - وساعات ما يكونش فيه حول خالص

ودي أشهر الأسئلة اللي الناس بيسألوها عن الحول الوحشي المتقطع :

" هو الحول المتقطع ممكن يضعف النظر ؟ "

-        العين نظرها مش بيضعف أبداً من الحول المتقطع لأن كل شوية العين بتتعدل وتبص طبيعي .. عشان كده نظرها مش بيضعف

" طيب ليه نعمل عملية مادام الحول ده مش بيضعف النظر ؟ "

-        رغم ان الحول المتقطع ملوش أي ضرر الا ان مفيش أم بتوافق أبداً انها تسيب بنتها تحول بالمنظر ده ودايماً يطلبوا مني انهم يعملوا عملية عشان الحول ده ما يظهرش تاني

" هو الحول ده ملوش علاج إلا العملية ؟ "

-        الحول الوحشي المتقطع لايمكن نمنعه من الظهور إلا بعمل العملية قولاً واحداً .. النظارة والتمارين علاج مش مؤكد للحول المتقطع .. ساعات بتنفع وغالباً لأ.

" طيب نسبة نجاح العملية كام في المية ؟ "

-        نسبة نجاح عملية الحول الوحشي المتقطع تقريباً 100%

" طيب هو الحول ده ممكن يرجع تاني بعد العملية ؟ "

-        الحول الوحشي المتقطع من أنواع الحول اللي تقريباً مش بيرجع تاني .. نسبة رجوعه نادرة جداً

" طيب ايه انسب سن لعمل العملية ؟ "

-      سن 4 سنين هو أنسب سن لعمل عملية الحول الوحشي المتقطع

" طيب ممكن تتعمل في سن أصغر من كده ؟ "

-        ممكن لو الحول بيظهر كتير أوي وبدأ يتحول لحول دائم مش متقطع بنعمل العملية في أي سن .. مش لازم 4 سنين

حمد الله على سلامتك يا حبيبتي وألف مبروك نجاح عمليتك

مركز علتذكاري للأبحاث الرم